ఉత్తరాంధ్ర ప్రజల దశాబ్దాల నిరీక్షణకు, సాగునీటి కలకు ఎట్టకేలకు తెరపడింది. పోలవరం ప్రాజెక్టు ఎడమ ప్రధాన కాలువ ద్వారా గోదావరి జలాలు అనకాపల్లి జిల్లాకు విజయవంతంగా చేరుకున్నాయి. ఈ రోజే ముఖ్యమంత్రి చంద్రబాబు నాయుడు అనకాపల్లి జిల్లా పాయకరావుపేట నియోజకవర్గ పరిధిలోని పీఎల్ పురం గ్రామం వద్ద ఈ పవిత్ర గోదావరి జలాలకు సాంప్రదాయబద్ధంగా “జలహారతి” సమర్పించి అధికారికంగా నీటిని విడుదల చేస్తున్నారు. 2024లో కూటమి ప్రభుత్వం అధికారంలోకి వచ్చిన నాటి నుండి ఉత్తరాంధ్రకు గోదావరి జలాలను అందించడమే పరమావధిగా పనులు పరుగులు పెట్టించింది.
పోలవరం ప్రాజెక్ట్ యొక్క ప్రధాన డ్యామ్, హెడ్వర్క్స్ పనులు ఇంకా కొనసాగుతున్నప్పటికీ, ఉత్తరాంధ్ర మరియు అనకాపల్లి జిల్లా ప్రజల తాగునీరు, సాగునీటి అవసరాలను తక్షణమే తీర్చాలని చంద్రబాబు ప్రభుత్వం ఒక మాస్టర్ ప్లాన్ వేసింది. ఇందుకోసం పురుషోత్తపట్నం మరియు పుష్కర లిఫ్ట్ ఇరిగేషన్ పంపింగ్ ఏర్పాట్లను ఉపయోగించుకుని, ఎడమ కాలువ ద్వారా నీటిని ఎత్తిపోస్తున్నారు. దాదాపు 213 కిలోమీటర్ల పొడవున్న ఈ పోలవరం ఎడమ ప్రధాన కాలువ నిర్మాణం కోసం ఇప్పటివరకు ప్రభుత్వం రూ. 4,192 కోట్లు ఖర్చు చేసింది. 2024 లో కూటమి ప్రభుత్వం అధికారంలోకి వచ్చిన తర్వాత ఎడమ కాలువకు సంబంధించిన భూసేకరణ, మిగిలిపోయిన లింక్ పనులు, లైనింగ్ పనులను శరవేగంగా పూర్తి చేశారు.
ఈ చారిత్రాత్మక నీటి విడుదల ద్వారా అనకాపల్లి, విశాఖపట్నం, కాకినాడ మరియు ఉమ్మడి తూర్పుగోదావరి జిల్లాల్లోని దాదాపు 2,87,320 ఎకరాల ఆయకట్టు స్థిరీకరణ జరగనుంది. మొదటి దశలో భాగంగా గోదావరి నుంచి సుమారు 27 టీఎంసీల నీటిని అనకాపల్లి, విశాఖ ప్రాంతాల వరకు తరలించేలా చానలైజ్ చేశారు. తుని – నర్సీపట్నం రోడ్డును క్రాస్ చేస్తూ నిర్మించిన భారీ అక్విడెక్టు గేట్లను ఎత్తి, సీఎం చంద్రబాబు ఈ కాలువ రెగ్యులేటర్ ద్వారా నీటిని ఉత్తరాంధ్ర వైపునకు పరుగులు పెట్టించారు. ఏలేరు, పంపా, తాండవ నదుల మీదుగా ప్రవహిస్తూ ఈ గోదావరి జలాలు అనకాపల్లిని ముద్దాడాయి.
ఈ ప్రాజెక్ట్ కేవలం సాగునీటికే పరిమితం కాలేదు. ఉత్తరాంధ్ర ప్రాంతంలో సుమారు 5.23 లక్షల మంది జనాభాకు శాశ్వత తాగునీటి కష్టాలు తీరబోతున్నాయి. పోలవరం ఎడమ కాలువ కింద ఉన్న సుమారు 143 గ్రామాలకు దీని ద్వారా స్వచ్ఛమైన తాగునీరు అందుతుంది. దీనితో పాటు ఫార్మా సిటీ, విశాఖపట్నం స్టీల్ ప్లాంట్, మరియు అనకాపల్లి, గాజువాక పరిసర ప్రాంతాల్లో పెరుగుతున్న పారిశ్రామిక నీటి అవసరాలను తీర్చడానికి కూడా ఈ గోదావరి జలాలు అత్యంత కీలకంగా మారనున్నాయి. కాలువల వెంబడి ఉన్న 11 జాతీయ రహదారుల క్రాసింగ్ల వద్ద ఉన్న సంక్లిష్ట ఇంజనీరింగ్ సవాళ్లను అధిగమించడానికి ప్రభుత్వం గత కొన్ని నెలల్లోనే ప్రత్యేకంగా రూ. 1,500 కోట్ల నుండి రూ. 1,800 కోట్లు కేటాయించి పనులను ముగించింది.
ఇటీవలే ప్రకాశం జిల్లాలో వెలిగొండ ప్రాజెక్టు ఫేజ్-1 ని విజయవంతంగా ప్రారంభించిన చంద్రబాబు నాయుడు, ఇప్పుడు వెంటనే పోలవరం ఎడమ కాలువ ద్వారా అనకాపల్లికి నీళ్లు అందించడం ఉత్తరాంధ్ర సుజల స్రవంతి ప్రాజెక్టు విజయానికి తొలి అడుగుగా నిలిచింది. 2028 నాటికి పోలవరం మెయిన్ డ్యామ్ సహా పూర్తి ప్రాజెక్టును వంద శాతం ముగించాలని కూటమి ప్రభుత్వం మైల్స్టోన్గా పెట్టుకుంది. అనకాపల్లి రైతుల దశాబ్దాల నిరీక్షణను నిజం చేస్తూ వచ్చిన ఈ గోదావరి జలాలు ఉత్తరాంధ్ర అభ్యుదయానికి కొత్త ఊపిరి పోశాయనడంలో ఎలాంటి సందేహం లేదు.
