దసరా, సద్దుల బతుకమ్మ పండగల వేళ తెలంగాణ రాష్ట్రంలో మద్యం విక్రయాలు ఆకాశాన్ని తాకాయి. పండగ సంబరాల్లో భాగంగా రాష్ట్రవ్యాప్తంగా మద్యం ప్రియులు భారీ ఎత్తున కొనుగోళ్లు జరపడంతో మద్యం అమ్మకాల్లో సరికొత్త రికార్డులు నమోదయ్యాయి. సద్దుల బతుకమ్మ, దాని మరుసటి రోజు, దసరా పండుగ రోజులతో కలిపి కేవలం మూడు రోజుల వ్యవధిలోనే ఏకంగా రూ. 650 కోట్ల విలువైన మద్యం అమ్ముడుపోవడం విశేషం. పండగ సీజన్ డిమాండ్‌ను తట్టుకునేందుకు వైన్ షాపుల యజమానులు ముందుగానే వైన్స్, బార్ల కోసం ప్రభుత్వ డిపోల నుంచి భారీగా స్టాక్‌ను తరలించారు.
అక్టోబర్ 19వ తేదీ నాటికే రికార్డు స్థాయిలో దాదాపు రూ. 2054.51 కోట్ల విలువైన మద్యాన్ని డిపోల నుంచి వైన్ షాపుల యజమానులు ముందస్తుగా కొనుగోలు చేసి నిల్వ చేసుకున్నారు. పండగ మూడు రోజులు మద్యం దుకాణాల వద్ద కొనుగోలుదారుల రద్దీ విపరీతంగా పెరగడంతో డిపోల నుంచి తీసుకెళ్లిన స్టాక్ వేగంగా అమ్ముడైంది. గత ఏడాదితో పోలిస్తే ఈసారి దసరా పండగ సీజన్‌లో మద్యం విక్రయాలు దాదాపు 20 శాతం వరకు అధికంగా నమోదయ్యే అవకాశం ఉందని అబ్కారీ శాఖ అధికారులు అంచనా వేస్తున్నారు. పండగ సెలవులు, వరుస వేడుకలు తోడవడంతో తెలంగాణలో ఈసారి దసరా లిక్కర్ సేల్స్ సరికొత్త మైలురాయిని చేరుకున్నాయి.
