ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ పుట్టినరోజు వేడుకలు తెలుగు రాష్ట్రాల సరిహద్దులు దాటి పొరుగు రాష్ట్రమైన కేరళలోనూ జనసేన జోష్ను నింపాయి. కేరళలోని ప్రతిష్టాత్మక విద్యాసంస్థ ‘NIT-కాలికట్’ వేదికగా 300 మందికి పైగా విద్యార్థులు, యువత ఒక్కటై జనసేనాని జన్మదిన వేడుకలను అత్యంత ఘనంగా నిర్వహించారు. కేవలం తెలుగు రాష్ట్రాల వారే కాకుండా, స్థానిక కేరళ యువత కూడా ఈ వేడుకల్లో ఎంతో ఉత్సాహంగా పాల్గొనడం పవన్ కల్యాణ్కు ఇతర రాష్ట్రాల్లో ఉన్న అసాధారణ క్రేజ్ మరియు ప్రజాదరణకు అద్దం పడుతోంది.
పవన్ కల్యాణ్ పట్ల యువతలో ఉన్న ఈ భారీ అభిమానానికి ఆయన చూపించే సామాజిక బాధ్యత, ప్రజాసేవ పట్ల ఉన్న అచంచలమైన నిబద్ధతే ప్రధాన కారణమని విద్యార్థులు కొనియాడారు. రాజకీయాల్లో ఆయన అనుసరిస్తున్న సిద్ధాంతాలు, సమాజ మార్పు కోసం ఆయన పడుతున్న తపన తమను ఎంతగానో ఆకర్షించాయని కేరళ యువత ఈ సందర్భంగా వ్యక్తపరిచారు. మారుమూల కేరళ ప్రాంతంలోనూ జనసేన జెండాలు పట్టుకుని యువత జైకొట్టిన దృశ్యాలు ప్రస్తుతం సోషల్ మీడియాలో విపరీతంగా వైరల్ అవుతూ జనసైనికుల్లో సరికొత్త ఉత్సాహాన్ని నింపుతున్నాయి.
