ఆంధ్రప్రదేశ్లో రాబోయే స్థానిక సంస్థల ఎన్నికల వేళ పల్నాడు జిల్లా రాజకీయం అత్యంత ఆసక్తికరంగా మారింది. “ఎట్టి పరిస్థితుల్లోనూ ఏకగ్రీవాలు కావొద్దు, ప్రతి స్థానంలోనూ పోటీ చేయాల్సిందే” అని వైఎస్ఆర్ కాంగ్రెస్ పార్టీ అధినేత వైఎస్ జగన్ మోహన్ రెడ్డి పార్టీ శ్రేణులకు అంతర్గతంగా పదే పదే పిలుపునిస్తున్నారు. అయితే, 2021 నాటి స్థానిక ఎన్నికల్లో అధికార బలంతో పల్నాడు గడ్డపై వైకాపా ఏ స్థాయిలో రెచ్చిపోయిందో అందరికీ తెలిసిందే. నాడు ప్రతిపక్షాల నామినేషన్లను అడ్డుకుని బలవంతపు ఏకగ్రీవాలు చేసుకున్న వైకాపాకు, ఈసారి సరికొత్త రకమైన ఇబ్బందులు పల్నాడు పార్లమెంట్ పరిధిలో తలనొప్పిగా మారాయి.
ప్రస్తుతం క్షేత్రస్థాయిలో పార్టీ కార్యకర్తలు యాక్టివ్గా ఉండి పోటీకి సిద్ధమవుతున్నా.. వారిని నడిపించాల్సిన ముఖ్య నేతలు మాత్రం పూర్తిగా సైలెంట్ అయిపోయారు. కూటమి ప్రభుత్వం అధికారంలోకి వచ్చిన తర్వాత పల్నాడు వ్యాప్తంగా గత ఐదేళ్ల అరాచకాలపై పాత కేసులు రీఓపెన్ కావడం, కొత్తగా ల్యాండ్ గ్రాబింగ్ మరియు దౌర్జన్యాల కేసులు నమోదు అవుతుండటంతో వైకాపా అగ్ర నేతలు అండర్ గ్రౌండ్ కు వెళ్లారు. చాలామంది నేతలు అరెస్టుల భయంతో ముందస్తు బెయిళ్ల కోసం కోర్టుల చుట్టూ తిరుగుతున్నారు.
అత్యంత విచారకరమైన విషయం ఏమిటంటే.. క్షేత్రస్థాయిలో కేసులు నమోదు అయి ఇబ్బందులు పడుతున్న సామాన్య కార్యకర్తలకు వైకాపా అధిష్టానం కనీసం భరోసా ఇవ్వడం గానీ, ధైర్యం చెప్పడం గానీ చేయడం లేదు. లీగల్ సపోర్ట్ లేకపోవడం, పార్టీ అధిష్టానం తమను పట్టించుకోకపోవడంతో కేడర్ ఒంటరిపోరాటం చేస్తోంది. ఈ గందరగోళ పరిస్థితుల నేపథ్యంలో పల్నాడు పార్లమెంట్ పరిధిలోని 7 అసెంబ్లీ నియోజకవర్గాల్లోని తాజా రాజకీయ స్థితిగతులు ఇలా ఉన్నాయి.
నరసరావుపేట & గురజాల: నరసరావుపేటలో మాజీ ఎమ్మెల్యే గోపిరెడ్డి శ్రీనివాసరెడ్డి, గురజాలలో కాసు మహేష్ రెడ్డిల హవా పూర్తిగా తగ్గింది. నియోజకవర్గాల్లో పట్టు కోల్పోయిన ఈ నేతలు.. కేసులు మరియు విచారణల భయంతో స్థానిక సంస్థల ఎన్నికల ప్రచారానికి, కేడర్ సమన్వయానికి దూరంగా ఉంటున్నారు. దీనితో ఇక్కడ కూటమి అభ్యర్థుల హవా స్పష్టంగా కనిపిస్తోంది.
మాచర్ల & వినుకొండ: 2021 లో అరాచకాలకు కేరాఫ్ అడ్రస్గా నిలిచిన మాచర్లలో మాజీ ఎమ్మెల్యే పిన్నెల్లి రామకృష్ణారెడ్డి చుట్టూ ఉన్న కేసుల ఉచ్చు వల్ల ఆయన పాలిటిక్స్ లో యాక్టివ్ కాలేకపోతున్నారు. వినుకొండలో బొల్లా బ్రహ్మనాయుడు కూడా పూర్తిగా డిఫెన్స్లో పడ్డారు. ఇక్కడ వైకాపా కార్యకర్తలు పోటీకి ఉత్సాహం చూపిస్తున్నా, లీడర్ల అండ లేక చల్లబడుతున్నారు.
సత్తెనపల్లి & పెదకూరపాడు: సత్తెనపల్లిలో అంబటి రాంబాబు కేవలం సోషల్ మీడియా వ్యాఖ్యలకే పరిమితమవ్వగా.. పెదకూరపాడులో నంబూరు శంకరరావు అసలు నియోజకవర్గంలోనే కనిపించడం లేదు. నాయకత్వ లోపంతో ఈ రెండు చోట్లా వైకాపా తీవ్రమైన ఒడిదుడుకులు ఎదుర్కొంటోంది.
చిలకలూరిపేట: విడదల రజని ఇక్కడి నుండి పక్కకు తప్పుకున్న తర్వాత పార్టీని నడిపించే నాథుడే కరువయ్యాడు. స్థానిక మున్సిపల్ మరియు జెడ్పీటీసీ స్థానాల్లో పోటీ చేయడానికి అభ్యర్థులు ఉన్నప్పటికీ, వారికి బి-ఫారాలు ఇచ్చి ఆర్థికంగా వెన్నుదన్నుగా నిలిచే నాయకులు లేకపోవడంతో కూటమి క్లీన్ స్వీప్ దిశగా దూసుకుపోతోంది.
