ఆంధ్రప్రదేశ్ స్థానిక సంస్థల ఎన్నికల రంగం సిద్ధమవుతున్న వేళ, ప్రతిపక్ష వైఎస్సార్ కాంగ్రెస్ పార్టీ అంతర్గత రాజకీయాల్లో నిధుల నిర్వహణ వ్యవహారం తీవ్ర కలకలం రేపుతోంది. “నేను రూపాయి ఖర్చు పెట్టను.. రీజనల్ కోఆర్డినేటర్లే అంతా చూసుకోవాలి, స్థానిక ఇంచార్జ్‌లతోనే ఖర్చులు పెట్టించండి” అంటూ వైఎస్సార్‌సీపీ అధినేత వైఎస్ జగన్ మోహన్ రెడ్డి పార్టీ కీలక నేతలకు స్పష్టమైన సంకేతాలు ఇచ్చినట్లు పొలిటికల్ సర్కిల్స్‌లో జోరుగా ప్రచారం సాగుతోంది. అధినేత తీసుకున్న ఈ కఠిన నిర్ణయంతో అటు రీజనల్ కోఆర్డినేటర్లు, ఇటు నియోజకవర్గ ఇన్‌చార్జ్‌లు తీవ్ర ఒత్తిడిలో మునిగిపోయారు.
సార్వత్రిక ఎన్నికల ఓటమి తర్వాత పార్టీ క్యాడర్‌ను యాక్టివ్ చేయడం కోసం జగన్ వరుస సమీక్షలు నిర్వహిస్తున్నారు. అయితే, స్థానిక సంస్థల ఎన్నికల ఖర్చుల విషయంలో కేంద్ర కార్యాలయం నుండి ఎలాంటి ఆర్థిక సహాయం అందబోదనే విషయాన్ని ఆయన ముందే తేల్చి చెప్పినట్లు తెలుస్తోంది. పార్టీ అధికారంలో ఉన్న ఐదేళ్ల కాలంలో క్షేత్రస్థాయిలో, జిల్లాల వారీగా ఆర్థికంగా బలపడిన నేతలే ఇప్పుడు అభ్యర్థులను నిలబెట్టి, గెలిపించుకోవాల్సిన బాధ్యతను తీసుకోవాలని జగన్ భావిస్తున్నట్లు విశ్లేషకులు చెప్తున్నారు. నిధుల కోసం తన వైపు చూడకుండా, సొంత రిసోర్సెస్‌తోనే మైదానంలోకి దూకాలని క్యాడర్‌కు స్పష్టం చేయడమే దీని వెనుక ప్రధాన ఉద్దేశంగా కనిపిస్తోంది.
జగన్ ఇచ్చిన ఈ షాకింగ్ డెడ్‌లైన్‌తో రీజనల్ కోఆర్డినేటర్లకు ఏం చేయాలో పాలుపోవడం లేదు. సాధారణంగా అభ్యర్థుల ఎంపిక, వ్యూహాల రచన మాత్రమే కోఆర్డినేటర్ల పని. కానీ ఇప్పుడు జిల్లాల్లో ఎన్నికల ఖర్చులకు కావలసిన మేనేజ్‌మెంట్‌ను కూడా వారే భుజాన వేసుకోవాల్సి వస్తోంది. నియోజకవర్గాల్లో ఉన్న ఇంచార్జ్‌లతో మాట్లాడి, వారి ద్వారా నిధులను రాబట్టడం కోఆర్డినేటర్లకు పెద్ద సవాల్‌గా మారింది. ఇప్పటికే సార్వత్రిక ఎన్నికల ఖర్చులతో డీలా పడిన నేతలు, ఇప్పుడు స్థానిక పోరుకు మళ్లీ భారీగా ఖర్చు పెట్టడానికి వెనుకంజ వేస్తుండటంతో, వారిని ఒప్పించడం కోఆర్డినేటర్లకు తలనొప్పిగా మారింది.
మరోవైపు నియోజకవర్గ ఇంచార్జ్‌ల పరిస్థితి మరింత గందరగోళంగా ఉంది. గత అసెంబ్లీ ఎన్నికల్లో ఓడిపోయి ఆర్థికంగా, రాజకీయంగా కోలుకోని స్థితిలో ఉన్న చాలా మంది ఇంచార్జ్‌లపై ఇప్పుడు స్థానిక సంస్థల ఖర్చుల భారం పడింది. రీజనల్ కోఆర్డినేటర్ల నుండి వస్తున్న ఒత్తిడిని భరించలేక కొందరు నేతలు పరోక్షంగా అసంతృప్తి వ్యక్తం చేస్తున్నట్లు ప్రచారం జరుగుతోంది. తాము పోటీ చేయకపోయినా, కార్పొరేషన్లు, మున్సిపాలిటీలు, జెడ్పీటీసీ, ఎంపీటీసీ స్థానాల్లో నిలబడే అభ్యర్థుల వ్యయాన్ని భరించడం తమ వల్ల కాదని కొందరు చేతులెత్తేస్తున్నట్లు తెలుస్తోంది.
ఎన్నికల బరిలో నిలబడాలంటే బలమైన ఆర్థిక వనరులు అవసరం. ముఖ్యంగా అధికార కూటమి వ్యూహాత్మకంగా దూసుకుపోతున్న తరుణంలో, వైఎస్సార్‌సీపీలో ఫండింగ్ కొరత, అంతర్గత ఒత్తిడి ఆ పార్టీ అవకాశాలను దెబ్బతీసే ప్రమాదం ఉందని రాజకీయ విశ్లేషకులు భావిస్తున్నారు. జగన్ తన జేబు నుండి రూపాయి తీయనని అనడం వెనుక నేతల్లో ఉన్న జవాబుదారీతనాన్ని పరీక్షించడమే వ్యూహమైనప్పటికీ.. క్షేత్రస్థాయిలో మాత్రం ఇది కోఆర్డినేటర్లకు, ఇంచార్జ్‌లకు ఊపిరాడనివ్వని ఒత్తిడిగా మారిందని పొలిటికల్ టాక్. భవిష్యత్తులో తమ రాజకీయ ఉనికిని కాపాడుకోవడానికి తప్పనిసరి పరిస్థితుల్లోనే కొందరు నేతలు సొంతంగా ఖర్చు పెట్టుకోవడానికి సిద్ధమవుతున్నట్లు విశ్లేషిస్తున్నారు.
