23 C
Vijayawada
Saturday, November 21, 2026
Home ఆంధ్రప్రదేశ్ తాడేపల్లి ప్యాలెస్‌లో పెత్తనం మొత్తం ఆ “పీఆర్వో”చేతిలో..?

తాడేపల్లి ప్యాలెస్‌లో పెత్తనం మొత్తం ఆ “పీఆర్వో”చేతిలో..?

0
8

ఆంధ్రప్రదేశ్ రాజకీయాల్లో వైఎస్సార్ కాంగ్రెస్ పార్టీ అంతర్గత వ్యవహారాలు ఇప్పుడు ఆసక్తికరమైన మలుపు తిరుగుతున్నాయి. ఒకప్పుడు వైసీపీ అంటే సజ్జల రామకృష్ణారెడ్డి, వైవీ సుబ్బారెడ్డి, విజయసాయిరెడ్డి వంటి సీనియర్ నేతల పేర్లే వినిపించేవి. కానీ, 2024 ఎన్నికల ఓటమి తర్వాత పార్టీలో సమీకరణాలు వేగంగా మారిపోయాయి. ముఖ్యంగా ఇటీవల కాలంలో తాడేపల్లి కేంద్రంగా పార్టీ వ్యవహారాలన్నింటినీ ఒక పీఆర్వో శాసిస్తున్నారన్న ప్రచారం ఏపీ రాజకీయ వర్గాల్లో హాట్ టాపిక్‌గా మారింది. మాజీ జర్నలిస్ట్, వైఎస్ భారతికి ప్రధాన సహాయకుడిగా ఉన్న పూడి శ్రీహరి ఇప్పుడు వైసీపీలో అసలైన ‘సూపర్ బాస్’గా అవతారమెత్తారనే విశ్లేషణలు బలంగా వినిపిస్తున్నాయి.

గత వైసీపీ ప్రభుత్వంలో ఉప ముఖ్యమంత్రిగా పనిచేసిన పూడి ముత్యాలనాయుడుకు సమీప బంధువైన పూడి శ్రీహరి, తొలుత మీడియా వ్యవహారాలు చూసుకునే పీఆర్వోగా అడుగుపెట్టారు. అయితే, వైఎస్ జగన్ కేసుల విచారణ, బెంగళూరు పర్యటనలతో బిజీగా ఉండటంతో పార్టీ రోజువారీ వ్యవహారాలన్నీ వైఎస్ భారతి పర్యవేక్షణలోకి వెళ్లాయి. ఈ క్రమంలో భారతికి, క్షేత్రస్థాయి నాయకులకు మధ్య పూడి శ్రీహరి ఏకైక వారధిగా మారిపోయారు. ప్రస్తుతం పార్టీకి సంబంధించిన ఏ సమాచారం అధిష్ఠానానికి చేరాలన్నా, లేదా అధిష్ఠానం నుంచి ఏ ఆదేశం కింది స్థాయికి రావాలన్నా అది శ్రీహరి ద్వారానే జరగాల్సిన పరిస్థితి ఏర్పడింది.

మరోవైపు, 2029 ఎన్నికల నాటికి పార్టీని పునర్నిర్మించేందుకు తమిళనాడు వ్యూహకర్త కపిల్ సాహు బృందాన్ని వైసీపీ రంగంలోకి దించింది. అయితే, కపిల్ సాహు డేటా విశ్లేషణకు సమాంతరంగా ‘సాక్షి’ విలేకరులతో ఒక ప్రత్యేక నిఘా బృందాన్ని కూడా ఏర్పాటు చేశారు. నియోజకవర్గ ఇన్‌ఛార్జులు ఎలా పనిచేస్తున్నారు? ఎవరు కేసులకు భయపడి కూటమి నేతలతో రాజీ పడుతున్నారు? అనే రహస్య నివేదికలన్నింటినీ తెప్పించుకుని, వాటిని ఫిల్టర్ చేసి అధిష్ఠానానికి అందించే బాధ్యతను పూడి శ్రీహరియే నిర్వహిస్తున్నారు. దీనివల్ల రాబోయే ఎన్నికల్లో ఎమ్మెల్యే టికెట్ల కేటాయింపులోనూ ఆయన నివేదికలే కీలకం కానున్నాయనే చర్చ జరుగుతోంది.

రాజకీయ కోణంలో విశ్లేషిస్తే, పాత తరం నేతలను పక్కన పెట్టి ఒక పీఆర్వో చేతిలో ఇంతటి అధికారం పెట్టడం వెనుక అధిష్ఠానం వ్యూహం స్పష్టంగా కనిపిస్తోంది. గత ఎన్నికల్లో సజ్జల తీసుకున్న నిర్ణయాల వల్లే పార్టీ దెబ్బతిందనే అసంతృప్తితో ఆయన్ను నామమాత్రం చేశారు. విజయసాయిరెడ్డి, వైవీ సుబ్బారెడ్డిలు దూరంగా ఉండటం, ధనుంజయరెడ్డి వంటి వారు కేసుల్లో చిక్కుకోవడంతో ఏర్పడిన శూన్యాన్ని పూడి శ్రీహరి భర్తీ చేశారు. అయితే, రాజకీయ అనుభవం ఉన్న సీనియర్ నేతలు, మాజీ మంత్రులు ఒక పీఆర్వో పెత్తనాన్ని ఎంతకాలం భరిస్తారన్నది పెద్ద ప్రశ్న. ఇది పార్టీలో కొత్త అసమ్మతికి దారితీస్తుందా లేక అధిష్ఠానం ఆశించినట్లుగా పార్టీని గాడిలో పెడుతుందా అనేది వేచి చూడాలి.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.