ఆంధ్రప్రదేశ్‌లో జాతీయ స్థాయి క్రికెట్ సందడి షురూ కాబోతోంది. భారత క్రికెట్ నియంత్రణ మండలి దేశవాళీ సీజన్‌లో భాగంగా రాష్ట్రంలో ప్రతిష్టాత్మక డొమెస్టిక్ మ్యాచ్‌లు నిర్వహించేందుకు ఆంధ్ర క్రికెట్ అసోసియేషన్ సర్వం సిద్ధం చేసింది. ఈ నెల 8వ తేదీ నుంచి 16వ తేదీ వరకు అండర్-19 వినూ మన్కడ్ ట్రోఫీ ఎలైట్ గ్రూప్ ‘ఈ’ మ్యాచ్‌లు ఏపీ వేదికగా జరగనున్నాయి. యువ క్రికెటర్లు తమ ప్రతిభను నిరూపించుకోవడానికి అత్యంత కీలకమైన ఈ టోర్నమెంట్‌కు వైజాగ్, విజయనగరం నగరాలు ఆతిథ్యమిస్తున్నాయి.
ఈ ప్రతిష్టాత్మక అండర్-19 టోర్నీలో ఎలైట్ గ్రూప్ ఈ మ్యాచ్‌లన్నీ విశాఖపట్నంలోని డాక్టర్ వైఎస్ రాజశేఖర రెడ్డి ACA-VDCA స్టేడియంతో పాటు విజయనగరంలోని విజ్జీ స్టేడియం వేదికలుగా జరగబోతున్నాయి. ఈ గ్రూప్‌లో దేశంలోని ఆరు బలమైన జట్లు తలపడనున్నాయి. గుజరాత్, కర్ణాటక, ఢిల్లీ, హిమాచల్ ప్రదేశ్, జార్ఖండ్, చండీగఢ్ జట్లు ఈ టోర్నీలో తమ అదృష్టాన్ని పరీక్షించుకోనున్నాయి. అక్టోబర్ 8న విశాఖ వేదికగా ఢిల్లీ వర్సెస్ గుజరాత్ మ్యాచ్‌తో, అలాగే విజయనగరం వేదికగా చండీగఢ్ వర్సెస్ హిమాచల్ ప్రదేశ్ మ్యాచ్‌తో ఈ టోర్నీ ఘనంగా ప్రారంభం కానుంది.
వినూ మన్కడ్ ట్రోఫీతో పాటు దేశంలోనే అత్యంత ప్రతిష్టాత్మకమైన ఫస్ట్-క్లాస్ టోర్నమెంట్ రంజీ ట్రోఫీ మ్యాచ్‌లు కూడా ఆంధ్రప్రదేశ్‌లో జరగబోతున్నాయి. రంజీ ట్రోఫీ ఎలైట్ గ్రూప్ బి లో భాగంగా ఆంధ్ర జట్టు ఆడే హోమ్ మ్యాచ్‌లకు విజయవాడ సమీపంలోని మూలపాడు క్రికెట్ స్టేడియం ఆతిథ్యం ఇవ్వనుంది. అక్టోబర్ 11 నుంచి దేశవ్యాప్తంగా రంజీ ఫేజ్-1 లీగ్ మ్యాచ్‌లు ప్రారంభం కానుండటంతో, మూలపాడు పిచ్‌పై సీనియర్ ఆటగాళ్ల మధ్య హోరాహోరీ పోరు సాగనుంది. ఒకేసారి అటు జూనియర్ల వన్డే క్రికెట్ టోర్నీ, ఇటు సీనియర్ల రంజీ ట్రోఫీ మ్యాచ్‌లు ఏపీలో జరుగుతుండటంతో స్థానిక క్రికెట్ అభిమానుల్లో ఉత్సాహం నెలకొంది. రాష్ట్రంలోని యువ క్రికెటర్లకు జాతీయ స్థాయి ఆటగాళ్లను దగ్గరగా చూసి నేర్చుకునేందుకు ఇది ఒక అద్భుతమైన అవకాశంగా నిలవనుంది.
