దేశ రాజధాని ఢిల్లీలో పొలిటికల్ హీట్ ఒక్కసారిగా పెరిగింది. కేంద్ర ఎన్నికల ప్రధాన కమిషనర్ జ్ఞానేష్‌కుమార్ తక్షణమే తన పదవికి రాజీనామా చేయాలంటూ కాక్రోచ్ జనతా పార్టీ రేపు భారీ నిరసనలకు, ఢిల్లీ ముట్టడికి పిలుపునిచ్చింది. ఈ నిరసనల పిలుపుతో కేంద్ర ప్రభుత్వం అలర్ట్ అయింది. ఢిల్లీలో ఎలాంటి అవాంఛనీయ సంఘటనలు జరగకుండా, శాంతిభద్రతలను కాపాడేందుకు వీలుగా ఢిల్లీ సరిహద్దుల్లో భారీగా పోలీసు బలగాలను మోహరించారు. సరిహద్దు దాటి లోపలికి వచ్చే ప్రతి వాహనాన్ని క్షుణ్ణంగా తనిఖీ చేసిన తర్వాతే అనుమతిస్తున్నారు.
రేపటి నిరసనల్లో పాల్గొనేందుకు వివిధ రాష్ట్రాలు, ప్రాంతాల నుంచి ఢిల్లీకి తరలివస్తున్న ఆందోళనకారులను పోలీసులు సరిహద్దుల్లోనే అడ్డుకుంటున్నారు. అనుమానితులను ముందస్తుగా అరెస్ట్ చేసి పోలీస్ స్టేషన్లకు తరలిస్తున్నారు. భద్రతా చర్యల్లో భాగంగా ఢిల్లీలోని ప్రధాన రైల్వే స్టేషన్లు, మెట్రో స్టేషన్లు, హోటళ్లు మరియు రెస్టారెంట్లలో పోలీసులు ముమ్మర తనిఖీలు చేపట్టారు. ఎక్కడికక్కడ నిఘా పెంచేందుకు సీసీటీవీ కెమెరాలను, డ్రోన్లను కూడా రంగంలోకి దించారు. ఎలాంటి నిరసన ర్యాలీలకు అనుమతి లేదని పోలీసులు స్పష్టం చేశారు.
ఈ ఆందోళనల నేపథ్యంలో నిరసనకారులు సోషల్ మీడియా ద్వారా సమాచారాన్ని చేరవేసుకోకుండా, పుకార్లు వ్యాపించకుండా అడ్డుకట్ట వేసేందుకు ప్రభుత్వం కీలక నిర్ణయం తీసుకుంది. భద్రతా కారణాల దృష్ట్యా రేపు, ఎల్లుండి ఢిల్లీలోని పలు సమస్యాత్మక ప్రాంతాల్లో ఇంటర్నెట్ సేవలను తాత్కాలికంగా బంద్ చేస్తున్నట్లు అధికారులు ప్రకటించారు. ఈ ఆంక్షల వల్ల స్థానిక ప్రజలకు, ఆఫీసుల నిర్వహణకు కొంత ఇబ్బంది కలిగే అవకాశం ఉన్నప్పటికీ, శాంతిభద్రతల పరిరక్షణ కోసమే ఈ కఠిన నిర్ణయాలు తీసుకోక తప్పలేదని పోలీస్ ఉన్నతాధికారులు వెల్లడించారు.
