న్యూజిలాండ్ పర్యటనలో ఉన్న టీమిండియా మేనేజ్‌మెంట్‌లో ఒక కీలక పరిణామం చోటుచేసుకోబోతోంది. హ్యామిల్టన్ వేదికగా మంగళవారం జరిగే మూడో వన్డే ముగిసిన వెంటనే భారత క్రికెట్ జట్టు కోచింగ్ స్టాఫ్ రెండు గ్రూపులుగా విడిపోనుంది. రాబోయే ప్రతిష్టాత్మక టెస్ట్ సిరీస్‌కు సన్నద్ధమవ్వడం కోసమే బోర్డు ఈ విధమైన వ్యూహాత్మక మార్పులు చేస్తోందని నివేదికలు స్పష్టం చేస్తున్నాయి. అయితే ఈ విభజన ప్రక్రియపై తుది నిర్ణయం తీసుకునే పూర్తి బాధ్యతను హెడ్ కోచ్ గౌతమ్ గంభీర్ చేతుల్లోనే ఉంచారు.
ప్రస్తుత ప్రణాళికల ప్రకారం.. 2027 వన్డే వరల్డ్ కప్ సన్నద్ధతను దృష్టిలో ఉంచుకుని హెడ్ కోచ్ గౌతమ్ గంభీర్, స్పిన్ బౌలింగ్ కోచ్ సాయిరాజ్ బహుతులేతో కలిసి వన్డే జట్టుతోనే ఉండనున్నారు. మౌంట్ మాంగనూయ్‌లో జరగబోయే మిగిలిన రెండు వన్డే మ్యాచ్‌ల కోసం వీరు వన్డే టీమ్‌తోనే ప్రయాణం కొనసాగిస్తారు. మరోవైపు, నవంబర్ 19 నుంచి ప్రారంభం కానున్న తొలి టెస్ట్ మ్యాచ్ కోసం వెల్లింగ్టన్‌లో ప్రత్యేకంగా ఏర్పాటు చేయబోయే ప్రిపరేటరీ క్యాంప్ బాధ్యతలను బ్యాటింగ్ కోచ్ సితాంశు కోటక్, ఫాస్ట్ బౌలింగ్ కోచ్ మోర్నీ మోర్కెల్ అందుకోనున్నారు.
వీరు నవంబర్ 11 నుంచే టెస్ట్ స్క్వాడ్ ఆటగాళ్లతో కలిసి కసరత్తులు ప్రారంభించనున్నారు. వన్డే జట్టులోని ముగ్గురు కీలక ఫాస్ట్ బౌలర్లు గుర్నూర్ బ్రార్, ఆకిబ్ నబీ, అర్ష్‌దీప్ సింగ్‌లు వన్డే సిరీస్ ముగిసిన తర్వాత కూడా టెస్ట్ జట్టుకు నెట్ బౌలర్లుగా, రిజర్వ్ ప్లేయర్లుగా న్యూజిలాండ్‌లోనే కొనసాగబోతున్నట్లు కోచింగ్ సిబ్బంది వెల్లడించారు. న్యూజిలాండ్ పిచ్‌లపై లభిస్తున్న అదనపు స్వింగ్, సీమ్ మూవ్‌మెంట్లు వన్డే ఫార్మాట్ లో సవాలుగా మారినప్పటికీ, ఇవి టెస్ట్ సిరీస్‌కు బ్యాటర్లకు అద్భుతమైన ప్రాక్టీస్‌లా ఉపయోగపడతాయని మేనేజ్‌మెంట్ భావిస్తోంది. ఈ మేరకు టెస్ట్ ఆటగాళ్ల కోసం 5 నుంచి 6 ప్రత్యేక నెట్ సెషన్లను ప్లాన్ చేసినట్లు బ్యాటింగ్ కోచ్ సితాంశు కోటక్ మీడియాకు స్పష్టం చేశారు.
