23 C
Vijayawada
Saturday, November 21, 2026
Home ఆంధ్రప్రదేశ్ బొత్స కోటకు గండికొట్టిన మహిళా నేతలు..!

బొత్స కోటకు గండికొట్టిన మహిళా నేతలు..!

0
8

ఉత్తరాంధ్ర రాజకీయాల్లో కీలకమైన విజయనగరం జిల్లా ప్రజా పరిషత్ పీఠం ఇప్పుడు నవతరం యువ మహిళల చేతుల్లోకి వెళ్లింది. విజయనగరం జెడ్పీ ఛైర్‌పర్సన్‌గా మజ్జి సిరి సహస్ర, వైస్ ఛైర్‌పర్సన్‌గా పాశల నీరజ ఏకగ్రీవంగా ఎన్నికవడం జిల్లా రాజకీయాల్లో ఆసక్తికరమైన మలుపు. దశాబ్దాలుగా మాజీ మంత్రి బొత్స సత్యనారాయణ కుటుంబం కనుసన్నల్లో నడిచిన విజయనగరం జిల్లా పరిషత్‌లో, ఇప్పుడు తెలుగుదేశం పార్టీ తరఫున ఇద్దరు యువ మహిళా నేతలు అత్యున్నత పీఠాలను అధిరోహించడం కూటమి వ్యూహాత్మక విజయానికి నిదర్శనంగా నిలుస్తోంది.

జెడ్పీ ఛైర్‌పర్సన్‌గా ఎన్నికైన మజ్జి సిరి సహస్ర రాజకీయ నేపథ్యం ఎంతో ఆసక్తికరమైనది. ఆమె గతంలో విజయనగరం జెడ్పీ ఛైర్మన్‌గా పనిచేసిన మజ్జి శ్రీనివాసరావు కుమార్తె. బీటెక్ పూర్తి చేసిన ఉన్నత విద్యావంతురాలైన సిరి సహస్ర, ‘చిన్నశ్రీను సోల్జర్స్’ పేరిట సేవా కార్యక్రమాలను నిర్వహిస్తూ యువతలో మంచి గుర్తింపు తెచ్చుకున్నారు. తండ్రితో పాటు టీడీపీలో చేరిన ఆమె, ఇటీవల జరిగిన జెడ్పీటీసీ ఎన్నికల్లో తెర్లం నియోజకవర్గం నుంచి బరిలోకి దిగి ఏకంగా 6,651 ఓట్ల భారీ మెజార్టీతో ఘన విజయం సాధించారు. కుల ధ్రువీకరణ పత్రం విషయంలో విపక్షాలు న్యాయపరమైన వివాదాలు లేవనెత్తినప్పటికీ, అధిష్ఠానం అండదండలతో ఆమె ఏకగ్రీవంగా ఛైర్‌పర్సన్ పీఠాన్ని దక్కించుకున్నారు.

మరోవైపు, వైస్ ఛైర్‌పర్సన్‌గా ఎన్నికైన పాశల నీరజ విజయం కూడా సామాన్యమైనది కాదు. బొండపల్లి జెడ్పీటీసీ స్థానం నుంచి టీడీపీ అభ్యర్థిగా పోటీ చేసిన నీరజ, ఏకంగా బొత్స సత్యనారాయణ కుమార్తె బొత్స అనూషపై 5,136 ఓట్ల భారీ ఆధిక్యంతో సంచలన విజయం సాధించారు. బొత్స కుటుంబానికి కంచుకోటలాంటి స్థానంలో గెలవడంతో తొలుత జెడ్పీ ఛైర్‌పర్సన్ రేసులోనూ ఆమె పేరు బలంగా వినిపించింది. మంత్రి కొండపల్లి శ్రీనివాస్ సహా పలువురు నేతలు నీరజ పేరును ప్రతిపాదించినప్పటికీ, సామాజిక సమీకరణాలు, రాజకీయ వ్యూహంలో భాగంగా సిరి సహస్రకు ఛైర్‌పర్సన్ పదవిని, నీరజకు వైస్ ఛైర్‌పర్సన్ పదవిని అప్పగిస్తూ టీడీపీ అధిష్ఠానం సమతుల్యత పాటించింది.

రాజకీయ కోణంలో విశ్లేషిస్తే, విజయనగరం జెడ్పీ పీఠంపై ఇద్దరు యువ మహిళలను కూర్చోబెట్టడం ద్వారా టీడీపీ ఒకే దెబ్బకు రెండు పిట్టలు కొట్టినట్లయింది. ఒకవైపు బొత్స కుటుంబ రాజకీయ ఆధిపత్యానికి పూర్తిగా చెక్ పెడుతూనే, మరోవైపు స్థానిక సంస్థల పాలనలో విద్యావంతులైన యువతకు, మహిళలకు పెద్దపీట వేస్తున్నామనే బలమైన సందేశాన్ని ప్రజల్లోకి పంపింది. తండ్రి వారసత్వాన్ని అందిపుచ్చుకుని రాజకీయాల్లోకి వచ్చిన సిరి సహస్ర, ప్రత్యర్థి కోటను బద్దలు కొట్టి ఎదిగిన పాశల నీరజ కలిసి విజయనగరం జిల్లా అభివృద్ధిని ఎలా ముందుకు తీసుకెళ్తారో చూడాలి.

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.