ఆంధ్రప్రదేశ్ రాజకీయాల్లో సరికొత్త సమీకరణాలు ఊపందుకుంటున్నాయి. నవంబర్ 11న విజయవాడ వేదికగా సరికొత్త రాజకీయ పార్టీని అధికారికంగా ప్రకటించబోతున్నట్లు మాజీ ఎంపీ వి. విజయసాయి రెడ్డి ఇప్పటికే వెల్లడించారు. ఈ నేపథ్యంలో పార్టీ స్థాపనకు ముందే ఆయన తన ‘ఆపరేషన్ ఆకర్ష్‌’కు తెరలేపారు. ముఖ్యంగా అధికార తెలుగుదేశం పార్టీలో ఉన్న రెడ్డి సామాజికవర్గ కీలక నేతలను టార్గెట్ చేస్తూ విజయసాయి రెడ్డి స్వయంగా రంగంలోకి దిగినట్లు రాజకీయ వర్గాల్లో జోరుగా చర్చ సాగుతోంది.
టీడీపీలో ప్రస్తుతం ఉన్నత స్థానాల్లో ఉంటూ, ఎక్కడో ఒకచోట అసంతృప్తితో ఉన్న లేదా ప్రాధాన్యత దక్కడం లేదని భావిస్తున్న రెడ్డి సామాజికవర్గ నేతలకు విజయసాయి రెడ్డి స్వయంగా ఫోన్లు చేస్తున్నట్లు సమాచారం. తన నూతన పార్టీ ఆశయాలను, భవిష్యత్తు కార్యాచరణను వారికి వివరిస్తూ.. అందరం కలిసి ఒకే తాటిపైకి రావాలని ఆయన ఆహ్వానిస్తున్నట్లు రాజకీయ వర్గాల టాక్. కేవలం ఫోన్ కాల్స్ మాత్రమే కాకుండా, కొందరు కీలక నేతలతో రహస్యంగా రాయబారాలు కూడా నడుపుతున్నట్లు తెలుస్తోంది.
ఆంధ్రప్రదేశ్‌లో రెడ్డి సామాజికవర్గానికి చెందిన అసలైన ఆత్మగౌరవాన్ని కాపాడటమే తన పార్టీ ముఖ్య ఉద్దేశాలలో ఒకటి అని విజయసాయి రెడ్డి ఇదివరకే ప్రకటించారు. ఇదే అస్త్రాన్ని ఉపయోగించి ఇప్పుడు టీడీపీలోని ఆ వర్గ నేతలను ఆకర్షించే ప్రయత్నం చేస్తున్నారు. టీడీపీలో ఇతర శక్తుల ఆధిపత్యం పెరిగిపోతోందన్న భావనలో ఉన్న నేతలను గుర్తించి, వారికి తన కొత్త పార్టీలో సముచిత స్థానం మరియు భవిష్యత్తుపై గట్టి హామీ ఇస్తున్నట్లు ప్రచారం జరుగుతోంది.
విజయసాయి రెడ్డి వ్యూహాలు అప్పుడే క్షేత్రస్థాయిలో పని చేయడం ప్రారంభించినట్లు కనిపిస్తోంది. తిరుపతికి చెందిన సీనియర్ నేత, టీటీడీ బోర్డు మాజీ సభ్యుడు ఓవీ రమణ ఇప్పటికే టీడీపీలో ఉన్న ఒంటెద్దు పోకడలు నచ్చడం లేదంటూ పార్టీకి రాజీనామా ప్రకటించారు. తాను విజయసాయి రెడ్డి ఏర్పాటు చేయబోయే కొత్త పార్టీలో చేరుతున్నట్లు ఆయన బహిరంగంగానే వెల్లడించారు. ఓవీ రమణ ఎపిసోడ్ కేవలం ప్రారంభం మాత్రమేనని, విజయసాయి రెడ్డి చేసిన ఫోన్ కాల్స్, సంప్రదింపుల ఫలితంగా రాబోయే రోజుల్లో రాయలసీమతో పాటు కోస్తా జిల్లాల నుంచి మరికొందరు టీడీపీ రెడ్డి సామాజికవర్గ నేతలు సైకిల్ దిగి ఆయన వైపు అడుగులు వేసే అవకాశం ఉందనే ఊహాగానాలు గట్టిగా వినిపిస్తున్నాయి. నవంబర్ 11న జరగబోయే పార్టీ ఆవిర్భావ సభలో ఈ చేరికలపై ఒక స్పష్టత వచ్చే అవకాశం ఉంది.
