నెల్లూరు మున్సిపల్ కార్పొరేషన్, స్థానిక సంస్థల ఎన్నికల్లో చారిత్రాత్మక విజయాన్ని నమోదు చేయడమే లక్ష్యంగా అధికార కూటమి శ్రేణులు అత్యంత సమన్వయంతో ముందుకు దూసుకుపోతున్నాయి. ఇందులో భాగంగా నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి నివాసంలో కూటమి అగ్ర నాయకులు అత్యంత కీలకమైన సమావేశాన్ని నిర్వహించారు. ఈ భేటీలో నెల్లూరు ఎంపీ వేమిరెడ్డి ప్రభాకర్ రెడ్డి, మంత్రి నారాయణ, ఎమ్మెల్సీ బీద రవిచంద్ర, మేయర్ అభ్యర్థి రూప్ కుమార్ యాదవ్, బీజేపీ సీనియర్ నేత వంశీధర్ రెడ్డి, జనసేన పార్టీ ఆర్గనైజింగ్ సెక్రటరీ వేములపాటి అజయ్ కుమార్ తదితరులు పాల్గొన్నారు.
కూటమి పార్టీల మధ్య విభేదాలు ఉన్నాయంటూ సోషల్ మీడియాలో విపక్షాలు చేస్తున్న ఫేక్ ప్రచారాలపై నేతలు ఈ సందర్భంగా తీవ్ర ఆగ్రహం వ్యక్తం చేశారు. ఓటమి భయంతోనే వైరి పక్షాలు ఇలాంటి అభూతకల్పనలను సృష్టిస్తున్నాయని మండిపడ్డారు. ఈ అత్యవసర సమావేశంలో నెల్లూరు మున్సిపల్ కార్పొరేషన్ పరిధిలోని అన్ని డివిజన్లలో కూటమి అభ్యర్థుల గెలుపు కోసం అనుసరించాల్సిన ప్రచార వ్యూహాలపై నేతలు సుదీర్ఘంగా చర్చించారు. మూడు పార్టీల నాయకులు, హేమాహేమీలు ఒకే చోట చేరి తామంతా ఒకే తాటిపై ఉన్నామని స్పష్టమైన సందేశాన్ని కేడర్‌కు పంపారు.
క్షేత్రస్థాయిలో తెలుగుదేశం, జనసేన, బీజేపీ కార్యకర్తలు పరస్పరం సహకరించుకుంటూ, ఓట్లు ఎక్కడా చీలిపోకుండా ప్రచారాన్ని ఉధృతం చేయాలని దిశానిర్దేశం చేశారు. ముఖ్యంగా సంక్షేమ పథకాలు, అభివృద్ధి కార్యక్రమాలను ప్రజల్లోకి బలంగా తీసుకెళ్లడం ద్వారా ఓటర్లను ఆకట్టుకోవాలని నిర్ణయించారు. ఈ విజయవంతమైన భేటీతో నెల్లూరు కూటమి వర్గాల్లో ఒక్కసారిగా పొలిటికల్ హీట్ పెరిగింది. అగ్ర నాయకత్వం అంతా ఎంతో ఆప్యాయంగా, ఐక్యమత్యంతో కలిసికట్టుగా అడుగులు వేస్తుండటం చూసి మూడు పార్టీల శ్రేణుల్లో అపారమైన నమ్మకం, ఉత్సాహం వ్యక్తమవుతున్నాయి. విపక్షాలు ఎన్ని కుయుక్తులు పన్నినా, దుష్ప్రచారాలు చేసినా నెల్లూరు గడ్డపై కూటమి జెండా ఎగరడం ఖాయమని నేతలు ధీమా వ్యక్తం చేశారు. ఈ ఏకీకృత వ్యూహంతో నెల్లూరు మున్సిపల్ కార్పొరేషన్‌ను కూటమి క్లీన్ స్వీప్ చేయడం ఖాయమని రాజకీయ విశ్లేషకులు భావిస్తున్నారు.
