భారతీయ రైల్వే నెట్వర్క్లో అత్యంత ప్రజాదరణ పొందిన రెండు ప్రతిష్టాత్మక ప్రీమియం రైళ్లు ‘రాజధాని ఎక్స్ప్రెస్’ మరియు ‘వందే భారత్’ ప్రయాణికులకు రెండు విభిన్న రకాల ప్రయాణ అనుభవాలను అందిస్తున్నాయి. 1969లో ప్రారంభమైన రాజధాని ఎక్స్ప్రెస్ దశాబ్దాలుగా సుదూర ప్రాంతాలకు, ముఖ్యంగా రాత్రిపూట పడుకుని ప్రయాణించే స్లీపర్ క్లాస్ వసతులకు పెట్టింది పేరు. మరోవైపు, 2019లో సరికొత్త సాంకేతికతతో వచ్చిన వందే భారత్ రైళ్లు ప్రధానంగా పగటిపూట నగరాల మధ్య వేగంగా ప్రయాణించేందుకు, కేవలం కూర్చునే ఏసీ చైర్ కార్ వసతులతో రూపొందించబడ్డాయి.
అయితే, తాజాగా వందే భారత్ స్లీపర్ రైళ్లు కూడా అందుబాటులోకి వస్తుండటంతో ఈ రెండింటి మధ్య ఉన్న వ్యత్యాసం క్రమంగా తగ్గుతోంది. ఈ రెండు రైళ్ల మధ్య ప్రధాన వ్యత్యాసం వేగం మరియు ప్రయాణ నిడివిలోనే కనిపిస్తుంది. రాజధాని ఎక్స్ప్రెస్ గంటకు గరిష్టంగా 130 కిలోమీటర్ల వేగంతో నడుస్తుండగా, వందే భారత్ కొన్ని ప్రత్యేక మార్గాల్లో గంటకు 160 కిలోమీటర్ల వేగంతో దూసుకెళ్లగలదు. ప్రయాణికుల భోజన వసతుల విషయానికి వస్తే, రాజధాని రైళ్లలో సుదూర ప్రయాణాల కారణంగా ఉదయం టీ, బ్రేక్ఫాస్ట్, లంచ్, డిన్నర్ వంటి విస్తృతమైన మెనూ ఉంటుంది.
వందే భారత్లో ప్రయాణ సమయాన్ని బట్టి భోజన సదుపాయం ఉంటుంది, పైగా టికెట్ బుకింగ్ సమయంలోనే ఆహారం వద్దనుకునే వెసులుబాటు కూడా ఉంది. అత్యాధునిక ఆటోమేటిక్ డోర్లు, జీపీఎస్ సమాచారం, బయో వ్యాక్యూమ్ టాయిలెట్లు వంటి ఫీచర్లతో వందే భారత్ కొత్త జనరేషన్ లుక్తో అలరిస్తుండగా, రైల్వే శాఖ రాజధాని కోచ్లను కూడా తేజస్ తరహాలో ఆధునీకరిస్తూ దీటైన పోటీని ఇస్తోంది.
