ప్రధానమంత్రి నరేంద్ర మోదీ అధ్యక్షతన సెప్టెంబర్ 16న జరిగిన కేంద్ర క్యాబినెట్ సమావేశంలో దేశంలోని ఉద్యోగులకు భారీ ఊరటనిచ్చే చారిత్రాత్మక నిర్ణయానికి ఆమోదం లభించింది. ఉద్యోగుల భవిష్య నిధి సంస్థ (EPFO) పరిధిలోకి వచ్చే ఉద్యోగుల గరిష్ట వేతన పరిమితిని ప్రస్తుత రూ. 15,000 నుండి ఏకంగా రూ. 25,000 కు పెంచుతూ కేంద్ర ప్రభుత్వం గ్రీన్ సిగ్నల్ ఇచ్చింది. ఈ విషయాన్ని కేంద్ర మంత్రి అశ్విని వైష్ణవ్ మీడియా సమావేశంలో వెల్లడించారు.
కేంద్ర ప్రభుత్వం తీసుకున్న ఈ నిర్ణయం వల్ల దేశవ్యాప్తంగా రూ. 15,000 నుండి రూ. 25,000 లోపు జీతం పొందే మరో 51 లక్షల మంది అదనపు ఉద్యోగులకు పీఎఫ్, ఉద్యోగుల పెన్షన్ పథకం పరిధిలోకి తప్పనిసరిగా వచ్చే భాగ్యం కలుగుతుంది. గతంలో జీతం రూ. 15,000 దాటితే యాజమాన్యాలు పీఎఫ్ అకౌంట్లు తెరవాల్సిన నిబంధన ఉండేది కాదు, కానీ ఇకపై రూ. 25,000 వరకు బేసిక్ జీతం ఉన్న ప్రతి ఒక్కరికీ ఈ సామాజిక భద్రత లభిస్తుంది. ఈ నూతన సవరణ వల్ల ప్రభుత్వ ఖజానాపై ఏడాదికి రూ. 11,339 కోట్ల అదనపు భారం పడనుందని కేంద్ర మంత్రి తెలిపారు.
గతంలో 2014 సెప్టెంబర్ నెలలో పీఎఫ్ వేతన పరిమితిని రూ. 6,500 నుండి రూ. 15,000 కు పెంచగా.. మళ్లీ దాదాపు 12 ఏళ్ల తర్వాత ఈ పరిమితిని సవరించారు. గడిచిన ఇన్నేళ్లలో ఉద్యోగుల సగటు ఆదాయం పెరగడం, పెరుగుతున్న జీవన వ్యయాలు, నిరంతర వేతన వృద్ధిని దృష్టిలో ఉంచుకుని మోదీ సర్కార్ ఈ సాహసోపేత నిర్ణయం తీసుకుంది. ప్రస్తుతం ఇపిఎఫ్ఓ పరిధిలో 7.98 కోట్ల మంది సభ్యులు, 7.68 లక్షల వ్యాపార సంస్థలు భాగస్వాములుగా ఉండగా, తాజా నిబంధనలతో ప్రైవేట్ రంగ ఉద్యోగుల పదవీ విరమణ కాలానికి మరింత ఆర్థిక భద్రత చేకూరనుంది.
