ఆంధ్రప్రదేశ్ రాజకీయాల్లో విజయవాడ వేదికగా జరిగిన ఒక తాజా పరిణామం ఇప్పుడు రాష్ట్రవ్యాప్తంగా తీవ్ర చర్చనీయాంశంగా మారింది. జనసేన అధినేత, డిప్యూటీ సీఎం పవన్ కల్యాణ్ను వంగవీటి రాధాకృష్ణ నేరుగా కలిసి చర్చలు జరపడం పొలిటికల్ సర్కిల్స్లో సంచలనం రేపుతోంది. వీరిద్దరూ పక్కపక్కనే నిలబడి నవ్వుతూ దిగిన ఫోటో సోషల్ మీడియాలో విపరీతంగా వైరల్ అవుతుండటంతో, ఈ కలయిక వెనుక ఉన్న రాజకీయ ఆంతర్యం ఏంటనే దానిపై పలు రకాల విశ్లేషణలు మొదలయ్యాయి.
రాబోయే మున్సిపల్ కార్పొరేషన్ ఎన్నికల నేపథ్యంలో విజయవాడ మేయర్ స్థానం కోసం కూటమిలో అంతర్గత సమీకరణాలు వేగంగా మారుతున్నాయి. ఈ క్రమంలోనే, విజయవాడ మేయర్ రేసులో నిలబడాలని భావిస్తున్న వంగవీటి రాధా.. పవన్ కల్యాణ్ మరియు జనసేన పార్టీ పూర్తి స్థాయి మద్దతును కూడగట్టడానికే ప్రత్యేకంగా వెళ్లి కలిశారనే యాంగిల్ బలంగా వినిపిస్తోంది. విజయవాడ నగరంలో జనసేన పార్టీకి ఉన్న బలమైన క్యాడర్, యువత మరియు కాపు సామాజిక వర్గ ఓటు బ్యాంక్ మద్దతు ఉంటేనే అక్కడ విజయం నల్లేరుపై నడక అవుతుందని రాధా భావిస్తున్నట్లు తెలుస్తోంది.
గత అసెంబ్లీ ఎన్నికల్లో పోటీకి దూరంగా ఉన్నప్పటికీ కూటమి అభ్యర్థుల గెలుపు కోసం వంగవీటి రాధా విస్తృతంగా ప్రచారం చేశారు. ఆ సమయంలోనే ఆయనకు తగిన ప్రాధాన్యత ఇస్తామని టీడీపీ అధిష్టానం హామీ ఇచ్చింది. ఇప్పుడు బెజవాడ మేయర్ పీఠాన్ని వంగవీటి రాధాకు కేటాయించేందుకు టీడీపీ కూడా సానుకూలంగా ఉన్నట్లు టాక్ నడుస్తోంది. అయితే, కేవలం టీడీపీ బలంతోనే కాకుండా, జనసేనాని పవన్ కల్యాణ్ ఆశీస్సులు, ఆ పార్టీ క్యాడర్ గ్రౌండ్ లెవెల్ సపోర్ట్ వంద శాతం ఉంటేనే ప్రత్యర్థులకు గట్టి కౌంటర్ ఇవ్వవచ్చనే పక్కా వ్యూహంతోనే ఈ కీలక భేటీ జరిగినట్లు స్పష్టమవుతోంది. వంగవీటి రంగా వారసత్వం, పవన్ కల్యాణ్ క్రేజ్ కలిస్తే బెజవాడ మున్సిపల్ పోరులో కూటమికి తిరుగుండదని విశ్లేషకులు అంచనా వేస్తున్నారు.
