ఆంధ్రప్రదేశ్లో స్థానిక సంస్థల ఎన్నికల ముంగిట, క్షేత్రస్థాయిలో రాజకీయ సమీకరణాలు వేగంగా మారుతున్నాయి. అధికారం కోల్పోయిన వైఎస్సార్ కాంగ్రెస్ పార్టీని మళ్లీ గాడిలో పెట్టేందుకు, కేడర్లో ఉత్సాహం నింపేందుకు పార్టీ అధినేత వైఎస్ జగన్ మోహన్ రెడ్డి వరుస సమీక్షలు నిర్వహిస్తున్నారు. ముఖ్యంగా రాబోయే స్థానిక సంస్థల ఎన్నికలను వేదికగా చేసుకుని ఎకగ్రీవాలు లేకుండా, కూటమి ప్రభుత్వానికి గట్టి పోటీ ఇవ్వాలని ప్లాన్ చేస్తున్నారు. అయితే, ఈ తరుణంలో తాడేపల్లి ప్యాలెస్ వేదికగా జరిగిన అంతర్గత చర్చల్లో జగన్ వ్యూహాలకు పార్టీ సీనియర్ నేతల నుంచే ఊహించని ఆర్థిక బ్రేకులు పడినట్లు రాజకీయ వర్గాల్లో సంచలన టాక్ వినిపిస్తోంది.
కూటమి ప్రభుత్వం అధికారంలోకి వచ్చినప్పటి నుండి వైఎస్ఆర్సీపీ చేపడుతున్న మెజారిటీ ధర్నాలు, నిరసన కార్యక్రమాలు, ప్రెస్ కాన్ఫరెన్స్లు ఎక్కువగా ఉమ్మడి కృష్ణా, గుంటూరు అంటే.. ప్రస్తుత ఎన్టీఆర్, గుంటూరు, పల్నాడు, బాపట్ల జిల్లాల పరిధిలోనే కేంద్రీకృతమయ్యాయి. రాజధాని ప్రాంతానికి దగ్గరగా ఉండటం, పార్టీ కార్యాలయం తాడేపల్లిలో ఉండటంతో.. ఏ చిన్న కార్యక్రమం తలపెట్టినా ఆ ప్రభావం, బాధ్యత ఈ రెండు జిల్లాల నేతలపైనే పడుతోంది. నిరంతరాయంగా కార్యక్రమాలు నిర్వహించడం వల్ల ఇప్పటికే క్యాడర్ తీవ్ర అలసటకు గురైంది.
ప్రస్తుత రాజకీయాల్లో ఒక నిరసన లేదా ధర్నా విజయవంతం కావాలంటే భారీగా జన సమీకరణ చేయాల్సి ఉంటుంది. గ్రామాలు, మండలాల నుండి జనాలను వాహనాల్లో తరలించడం, వారికి రోజువారీ ఖర్చులు, భోజన వసతులు కల్పించడం వంటివన్నీ స్థానిక నియోజకవర్గ ఇన్ఛార్జ్లు, మాజీ ఎమ్మెల్యేల సొంత నిధుల నుంచే భరించాల్సి వస్తోంది. గత కొద్ది నెలలుగా వరుసగా జరుగుతున్న ఈ కార్యక్రమాల వల్ల నాయకుల ఆర్థిక వనరులు పూర్తిగా హరించుకుపోయాయనేది క్షేత్రస్థాయి నివేదిక.
ఐదేళ్ల పాటు అధికారంలో ఉన్నప్పటికీ, గత ప్రభుత్వ విధానాల వల్ల చాలా మంది ద్వితీయ శ్రేణి నాయకులకు ఆశించిన స్థాయిలో కాంట్రాక్టులు లేదా ఆర్థిక ప్రయోజనాలు లభించలేదనే అసంతృప్తి పార్టీలో మొదటి నుండి ఉంది. ఇప్పుడు అధికారం కోల్పోయిన తర్వాత, నియోజకవర్గాలను కాపాడుకోవడమే గగనంగా మారిన తరుణంలో.. మళ్లీ పంచాయతీ, జెడ్పీటీసీ, ఎంపీటీసీ వంటి స్థానిక సంస్థల ఎన్నికల్లో అభ్యర్థులకు భారీగా వెనక ఉండి ఫండింగ్ చేయడం తమ వల్ల కాదని నేతలు స్పష్టం చేస్తున్నారు.
కూటమి ప్రభుత్వం పూర్తి అధికార బలంతో ఉన్న సమయంలో, స్థానిక సంస్థల ఎన్నికల్లో పోటీ చేయడానికి క్షేత్రస్థాయి అభ్యర్థులు పెద్దగా ఆసక్తి చూపించడం లేదు. ఒకవేళ బలవంతంగా నిలబెట్టినా, ఎన్నికల ఖర్చులో మెజారిటీ భాగం పార్టీ అగ్రనాయకత్వమే భరించాలని కింద స్థాయి క్యాడర్ డిమాండ్ చేస్తోంది. అయితే, అటు తాడేపల్లి ప్యాలెస్ నుండి ఎలాంటి ఆర్థిక భరోసా లభించకపోవడం, ఇటు జిల్లాల నేతలపైనే భారం వేస్తుండటంతో ఈ ప్రతిష్టంభన ఏర్పడింది.
పార్టీని క్షేత్రస్థాయి నుండి బలోపేతం చేయాలని, అన్ని స్థానాల్లోనూ అభ్యర్థులను నిలబెట్టాలని జగన్ గట్టిగా ఆదేశిస్తున్నప్పటికీ, ఆర్థిక వనరుల సమస్యను పరిష్కరించకుండా ముందడుగు వేయడం అసాధ్యమని విశ్లేషకులు భావిస్తున్నారు. ఒకవేళ కృష్ణా, గుంటూరు వంటి కీలక జిల్లాల నేతలే ఈ రీతిగా వెనకడుగు వేస్తే, మిగిలిన జిల్లాల్లోనూ ఇదే పరిస్థితి పునరావృతమయ్యే ప్రమాదం ఉంది. ఈ నేపథ్యంలో, పార్టీ ఫండ్ నుండి స్థానిక ఎన్నికలకు సహాయం అందిస్తారా లేక బలమైన ఆర్థిక నేపథ్యం ఉన్న కొత్త అభ్యర్థులను వెతుక్కుంటారా అనేది ఇప్పుడు వైఎస్ఆర్సీపీలో మిలియన్ డాలర్ల ప్రశ్నగా మారింది.
