గిగ్ వర్కర్ల సమస్యలు తనకు తెలుసని, వారికి రక్షణ కల్పిస్తానని ఇచ్చిన మాటను నిలబెట్టుకుంటూ కొత్త చట్టాన్ని తీసుకొచ్చామని కాంగ్రెస్ అగ్రనేత రాహుల్ గాంధీ చేసిన ప్రకటన ఇప్పుడు దేశ రాజకీయాల్లో పెను సంచలనంగా మారింది. గిగ్ వర్కర్లకు 10 లక్షల రూపాయల ఆరోగ్య బీమా, 5 లక్షల రూపాయల ప్రమాద బీమా కల్పిస్తామని ఆయన ఇచ్చిన హామీ కేవలం ఒక రాష్ట్రానికి మాత్రమే పరిమితమయ్యే అంశం కాదు. ప్రస్తుతం దేశవ్యాప్తంగా సుమారు 1.2 కోట్ల నుంచి 1.43 కోట్ల మంది గిగ్, ప్లాట్‌ఫామ్ వర్కర్లు పనిచేస్తున్నట్లు అధికారిక గణాంకాలు చెబుతున్నాయి.
2029-30 నాటికి ఈ సంఖ్య ఏకంగా 2.35 కోట్లకు చేరుతుందని నీతి ఆయోగ్ అంచనా వేసింది. స్విగ్గీ, జొమాటో, ఓలా, ఉబర్, అమెజాన్ వంటి సంస్థల్లో పనిచేస్తున్న ఈ కోట్లాది మంది కార్మికుల సంక్షేమం ఇప్పుడు జాతీయ స్థాయిలో అతిపెద్ద రాజకీయ అస్త్రంగా మారుతోంది. రాహుల్ గాంధీ ప్రస్తావించిన ఈ గిగ్ వర్కర్ల సంక్షేమ చట్టం దేశంలోని అన్ని రాష్ట్రాల రాజకీయాలపై తీవ్ర ప్రభావం చూపే అవకాశం స్పష్టంగా కనిపిస్తోంది. పట్టణ, సెమీ అర్బన్ ప్రాంతాల్లో నివసించే యువతలో అత్యధికులు ఇప్పుడు డెలివరీ బాయ్స్, క్యాబ్ డ్రైవర్లుగా ఉపాధి పొందుతున్నారు.
వీరంతా పద్దెనిమిది నుంచి నలభై ఏళ్ల మధ్య వయసున్న క్రియాశీల ఓటర్లు కావడం విశేషం. వీరి కుటుంబాలను కూడా కలుపుకుంటే దేశవ్యాప్తంగా దాదాపు నాలుగు నుంచి ఐదు కోట్ల ఓట్లపై ఈ అంశం నేరుగా ప్రభావం చూపుతుంది. ఇప్పటివరకు కులాలు, మతాలు లేదా రైతులు, ప్రభుత్వ ఉద్యోగుల చుట్టూ తిరిగిన ఎన్నికల రాజకీయాలు, ఇప్పుడు వేగంగా విస్తరిస్తున్న ఈ కొత్త వర్గం వైపు మళ్లుతున్నాయి. ముఖ్యంగా కాంగ్రెస్ పాలిత రాష్ట్రాల్లో గిగ్ వర్కర్లకు ప్రత్యేక సంక్షేమ బోర్డు, లక్షలాది రూపాయల బీమా సౌకర్యం కల్పిస్తుండటంతో..
మహారాష్ట్ర, తమిళనాడు, ఆంధ్రప్రదేశ్, ఉత్తరప్రదేశ్, పశ్చిమ బెంగాల్ వంటి ఇతర రాష్ట్రాల ప్రభుత్వాలపై కూడా తీవ్ర ఒత్తిడి పెరుగుతోంది. రాబోయే అసెంబ్లీ ఎన్నికల్లో అన్ని రాజకీయ పార్టీలు తమ మేనిఫెస్టోలలో గిగ్ వర్కర్ల సంక్షేమాన్ని తప్పనిసరిగా చేర్చాల్సిన పరిస్థితి ఏర్పడింది. అంతేకాకుండా, హైదరాబాద్, బెంగళూరు, ఢిల్లీ, ముంబై వంటి మెట్రో నగరాల్లో పనిచేస్తున్న గిగ్ వర్కర్లలో అత్యధికులు ఉత్తరప్రదేశ్, బీహార్, ఒడిశా, జార్ఖండ్ వంటి రాష్ట్రాల నుంచి వలస వచ్చిన వారే. వారికి లభించే చట్టపరమైన రక్షణ గురించి వారి సొంత రాష్ట్రాల్లోని కుటుంబాలకు చేరడం వల్ల, ఆయా రాష్ట్రాల్లోనూ రాజకీయంగా చర్చ మొదలవుతుంది.
మరోవైపు, ఇప్పటివరకు గిగ్ వర్కర్లను కేవలం భాగస్వాములుగా మాత్రమే చూస్తూ, ఎలాంటి ఉద్యోగ భద్రత లేదా బీమా కల్పించని అగ్రిగేటర్ కంపెనీలకు కూడా ఈ చట్టం ముకుతాడు వేయనుంది. ఇకపై ఆయా సంస్థలు చట్టబద్ధంగా సంక్షేమ నిధికి తమ వాటాను చెల్లించాల్సి ఉంటుంది. మొత్తానికి, అసంఘటిత రంగంలో ఎలాంటి భద్రత లేకుండా శ్రమిస్తున్న కోట్లాది మంది యువతకు భరోసా కల్పించే ఈ అంశం, రాబోయే రోజుల్లో దేశంలోని అన్ని రాష్ట్రాల్లో ఎన్నికల ఫలితాలను శాసించే కీలక అంశంగా మారబోతోందని రాజకీయ విశ్లేషకులు భావిస్తున్నారు.
