అమెరికా మధ్యంతర ఎన్నికల్లో డొనాల్డ్ ట్రంప్ నాయకత్వంలోని రిపబ్లికన్ పార్టీ ఘోర పరాజయాన్ని చవిచూడటంతో ప్రపంచ కుబేరుడు ఎలన్ మాస్క్ సోషల్ మీడియా వేదికగా వ్యంగ్యాస్త్రాలు విసిరారు. రిపబ్లికన్ అభ్యర్థుల గెలుపు కోసం ఈ ఎన్నికల సీజన్లలో ఏకంగా 250 మిలియన్ డాలర్లు మన కరెన్సీలో సుమారు రూ. 2100 కోట్లు ఖర్చు చేసిన మాస్క్, ఫలితాలు రివర్స్ అవ్వడంతో ఎక్స్ లో సెటైరికల్ ట్వీట్ చేశారు. “ఈసారి ఎన్నికల్లో జోక్యం చేసుకునే నా స్పేస్ లేజర్లు పనిచేయలేదని అనుకుంటా” అంటూ మాస్క్ పెట్టిన పోస్ట్ నెట్టింట విపరీతంగా ట్రెండ్ అవుతోంది.
అమెరికా చట్టసభలైన ప్రతినిధుల సభ, సెనెట్ రెండింటినీ డెమొక్రాట్లు తిరిగి హస్తగతం చేసుకోవడంతో వాషింగ్టన్‌లో అధికార సమీకరణాలు మారిపోయాయి. ముఖ్యంగా రిపబ్లికన్లకు కంచుకోటగా భావించే టెక్సాస్ రాష్ట్రంలో డెమొక్రాట్ అభ్యర్థి జేమ్స్ తలారికో ఘన విజయం సాధించడం గమనార్హం. తన విజయం అనంతరం తలారికో మాట్లాడుతూ.. సోషల్ మీడియా అల్గారిథమ్‌లను శాసిస్తూ, వందల మిలియన్ డాలర్లు కుమ్మరించిన బిలియనీర్లపై తాము గెలిచామని, ట్రంప్ రాజకీయ హింసకు, అబద్ధాల ప్రచారానికి అమెరికా ఓటర్లు బుద్ధి చెప్పారని ఎలన్ మాస్క్‌ను ఉద్దేశించి తీవ్ర విమర్శలు చేశారు.
డెమొక్రాట్ల ఈ చారిత్రాత్మక విజయంతో భవిష్యత్తులో ఆర్టిఫిషియల్ ఇంటెలిజెన్స్, టెక్నాలజీ డేటా సెంటర్లపై కఠినమైన నిబంధనలు వచ్చే అవకాశం ఉందనే ఆందోళన టెక్ వర్గాలలో మొదలైంది. స్టాక్ మార్కెట్ ఫ్యూచర్స్ కూడా ఈ ఫలితాల ఎఫెక్ట్‌తో ఒడిదొడుకులను ఎదుర్కొంటున్నాయి. రాబోయే రెండేళ్ల కాలంలో అధ్యక్షుడు డొనాల్డ్ ట్రంప్ తీసుకునే ప్రతి బిల్లుకు, బడ్జెట్ నిర్ణయాలకు కాంగ్రెస్‌లో డెమొక్రాట్లు గట్టి బ్రేకులు వేయడం ఖాయమని స్పష్టమవుతోంది.
