ప్రపంచ క్రికెట్ పరుగుల రారాజు, టీమిండియా రన్ మెషిన్ విరాట్ కోహ్లీ వన్డే ఫార్మాట్‌లో మరో అరుదైన, చారిత్రాత్మక మైలురాయిని అధిగమించాడు. న్యూజిలాండ్‌తో ఆక్లాండ్‌ వేదికగా జరుగుతోన్న మొదటి వన్డే మ్యాచ్‌లో అతను సరికొత్త చరిత్ర లిఖించాడు. వన్డే క్రికెట్ చరిత్రలోనే నంబర్-3 స్థానంలో బ్యాటింగ్‌కు వచ్చి 13,000 పరుగుల మార్కును దాటిన ప్రపంచంలోనే మొట్టమొదటి బ్యాటర్‌గా విరాట్ కోహ్లీ సరికొత్త ప్రపంచ రికార్డును నెలకొల్పాడు.
ఈ మ్యాచ్ ప్రారంభానికి ముందు కోహ్లీ ఈ మైలురాయిని చేరడానికి కేవలం 12 పరుగుల దూరంలో నిలిచాడు. భారత్ 186 పరుగుల స్వల్ప లక్ష్య ఛేదనలో ఉండగా.. ఇన్నింగ్స్ 7వ ఓవర్లో తాను ఎదుర్కొన్న 13వ బంతికి సింగిల్ తీసి కోహ్లీ ఈ చారిత్రాత్మక ఘనతను తన ఖాతాలో వేసుకున్నాడు. ఒకే బ్యాటింగ్ పొజిషన్‌లో ఇన్ని వేల పరుగులు సాధించడం కోహ్లీ స్థిరత్వానికి నిదర్శనంగా నిలుస్తోంది. విరాట్ కోహ్లీ కేవలం 251 ఇన్నింగ్స్‌ల్లోనే ఈ 13 వేల పరుగుల మైలురాయిని అత్యంత వేగంగా అందుకోవడం విశేషం.
నంబర్-3 స్థానంలో 61.55 సగటుతో శిఖరాగ్రాన కొనసాగుతున్న కోహ్లీ, ఇదే పొజిషన్‌లో 48 సెంచరీలు, దాదాపు 70 అర్ధ సెంచరీలు సాధించి ప్రత్యర్థి బౌలర్లపై పూర్తి ఆధిపత్యం ప్రదర్శించాడు. ప్రపంచ క్రికెట్‌లో ఎందరో దిగ్గజాలు అన్ని ఫార్మాట్లు కలిపి కూడా 10,000 పరుగులు చేయలేకపోయిన తరుణంలో, కోహ్లీ కేవలం వన్డేల్లో ఒకే ఒక స్థానంలో 13,000 పరుగులు సాధించడం గమనార్హం. ఈ రికార్డుతో ఆస్ట్రేలియా మాజీ దిగ్గజ కెప్టెన్ రికీ పాంటింగ్ పేరిట ఉన్న రికార్డును కోహ్లీ మరింత వెనక్కి నెట్టాడు. పాంటింగ్ తన కెరీర్‌లో నంబర్-3 స్థానంలో 330 ఇన్నింగ్స్‌ల్లో 12,662 పరుగులు సాధించారు. వన్డే క్రికెట్ చరిత్రలో ఈ స్థానంలో 10 వేలకు పైగా పరుగులు చేసిన వారు కేవలం కోహ్లీ, పాంటింగ్ మాత్రమే కావడం విశేషం. కోహ్లీ ఈ ఏడాది కూడా వన్డేల్లో అద్భుతమైన ఫామ్‌ను కొనసాగిస్తూ 9 ఇన్నింగ్స్‌ల్లో 69 సగటుతో రెండు సెంచరీలతో కలిపి 552 పరుగులు సాధించి జోరు మీదున్నాడు.
