దేశంలోని కోట్లాది మంది అసంఘటిత, గిగ్ ప్లాట్‌ఫామ్ కార్మికులకు నరేంద్ర మోదీ నేతృత్వంలోని కేంద్ర ప్రభుత్వం భారీ శుభవార్త అందించింది. డెలివరీ బాయ్స్, రైడ్ షేరింగ్ డ్రైవర్లు మరియు ఫ్రీలాన్సర్లు వంటి గిగ్ వర్కర్లను దేశ అధికారిక సంక్షేమ పరిధిలోకి తీసుకువస్తూ కేంద్ర ప్రభుత్వం చారిత్రాత్మక నిర్ణయం తీసుకుంది. ఇందులో భాగంగా కేంద్ర కార్మిక మరియు ఉపాధి శాఖ మంత్రి అధ్యక్షతన అత్యున్నత స్థాయి “జాతీయ సామాజిక భద్రతా బోర్డు” ను ఏర్పాటు చేస్తూ ఉత్తర్వులు జారీ చేసింది.
ఈ నూతన బోర్డు కేంద్ర ప్రభుత్వం ప్రతిష్టాత్మకంగా తీసుకువచ్చిన సామాజిక భద్రతా కోడ్ చట్టబద్ధ ఫ్రేమ్‌వర్క్ కింద పనిచేస్తుందని అధికారులు స్పష్టం చేశారు. ఇప్పటివరకు ఎలాంటి అధికారిక గుర్తింపు, ఉపాధి భద్రత లేని అనధికారిక రంగ కార్మికులకు చట్టపరమైన రక్షణ కల్పించడమే ఈ బోర్డు యొక్క ప్రధాన ఉద్దేశ్యం. ఈ బోర్డు ఏర్పాటు ద్వారా దేశంలో గిగ్ ఎకానమీ నమ్ముకుని బతుకుతున్న లక్షలాది మంది యువతకు మరియు అసంఘటిత రంగ కార్మికులకు పెద్ద ఎత్తున ప్రయోజనం చేకూరనుంది.
ఉపాధి భద్రత లేని, అనధికారిక రంగ కార్మికులకు మెరుగైన ఆరోగ్య సేవలు, పెన్షన్, ప్రమాద బీమా వంటి కీలక సామాజిక భద్రతా ప్రయోజనాలను అందించడమే లక్ష్యంగా ఈ బోర్డు పనిచేయనుంది. కంపెనీల నుంచి నిధుల సమీకరణ, సంక్షేమ పథకాల రూపకల్పన మరియు వాటి అమలు తీరును ఈ బోర్డు పర్యవేక్షిస్తుంది. కేంద్ర ప్రభుత్వ ఈ కీలక నిర్ణయం వల్ల నిత్యం రోడ్లపై శ్రమిస్తూ, ఎటువంటి రక్షణ లేని గిగ్ ప్లాట్‌ఫామ్ కార్మికుల జీవితాల్లో సరికొత్త వెలుగులు రానున్నాయి.
