ఆంధ్రప్రదేశ్‌లోని అన్నదాతలకు కూటమి ప్రభుత్వం మరోసారి భారీ ఆర్థిక భరోసానిచ్చింది. 2026-27 ఆర్థిక సంవత్సరానికి సంబంధించి “అన్నదాత సుఖీభవ – పీఎం కిసాన్” పథకం కింద రెండో విడత పెట్టుబడి సాయాన్ని నేడు రైతుల ఖాతాల్లోకి నేరుగా బదిలీ చేసింది. ఈ విడతలో భాగంగా రాష్ట్ర ప్రభుత్వ వాటా కింద రూ.2,234.03 కోట్ల భారీ నిధులను విడుదల చేస్తూ ప్రభుత్వం ఉత్తర్వులు జారీ చేసింది. ముఖ్యమంత్రి చంద్రబాబు నాయుడు ప్రత్యేక ఆదేశాలతో ఈ నిధుల బదిలీ ప్రక్రియ అత్యంత వేగంగా జరిగింది.
కేవలం 24 గంటల వ్యవధిలోనే రాష్ట్రవ్యాప్తంగా దాదాపు 99.44 శాతం మంది అర్హులైన రైతుల బ్యాంక్ ఖాతాల్లోకి డైరెక్ట్ బెనిఫిట్ ట్రాన్స్‌ఫర్ పద్ధతిలో నగదు నేరుగా జమ అయింది. డిజిటల్ పేమెంట్స్ వ్యవస్థను సమర్థవంతంగా ఉపయోగించడం వల్లే ఇంత తక్కువ సమయంలో రైతులందరికీ ఆర్థిక సాయం అందడం సాధ్యమైంది. అయితే, వివిధ రకాల సాంకేతిక కారణాల వల్ల కేవలం 17,828 మంది రైతుల అకౌంట్లలో మాత్రం ప్రస్తుతానికి నిధులు జమ కాలేదు. దీనిపై ముఖ్యమంత్రి చంద్రబాబు నాయుడు స్పందిస్తూ.. ఆధార్ లింకేజ్ లేదా బ్యాంక్ అకౌంట్ మిస్‌మ్యాచ్ వంటి సాంకేతిక సమస్యలను వ్యవసాయ శాఖ అధికారులు త్వరితగతిన పరిష్కరించాలని ఆదేశించారు.
మిగిలిపోయిన ఆ కొద్దిమంది రైతులకు కూడా వీలైనంత త్వరగా అన్నదాత సుఖీభవ నిధులు చేరేలా చూడాలని స్పష్టం చేశారు. కూటమి ప్రభుత్వం అధికారంలోకి వచ్చిన ఈ రెండేళ్ల స్వల్ప వ్యవధిలోనే వ్యవసాయ రంగానికి అత్యంత ప్రాధాన్యతనిచ్చింది. కేంద్ర ప్రభుత్వ భాగస్వామ్యంతో కలిసి ఇప్పటివరకు అన్నదాత సుఖీభవ – పీఎం కిసాన్ పథకాల ద్వారా ఏకంగా రూ.15,236.35 కోట్లను నేరుగా రైతుల అకౌంట్లలో వేసి అండగా నిలిచింది. పెట్టుబడి సమయానికి చేతికి డబ్బులు అందుతుండటంతో రాష్ట్రవ్యాప్తంగా ఉన్న రైతాంగం హర్షం వ్యక్తం చేస్తోంది.
