తెలంగాణ రాష్ట్రంలో వానాకాలం సీజన్ ముగిసే సమయానికే ఊహించని తాగునీటి సంక్షోభం ముఖం టేస్తోంది. సాధారణంగా అక్టోబర్ నాటికి జలాశయాలు, చెరువులు నిండుకుండలను తలపించాల్సి ఉండగా.. ఈ ఏడాది వర్షభావ పరిస్థితుల కారణంగా భూగర్భ జలాలు అత్యంత వేగంగా అడుగంటుతున్నాయి. భూగర్భ జల వనరుల శాఖ నివేదికల ప్రకారం.. పసిఫిక్ మహాసముద్రంలో ఏర్పడిన తీవ్రమైన ‘ఎల్నినో’ వాతావరణ ప్రభావం వల్లే రాష్ట్రంలో ఈ అకాల నీటి ఎద్దడి ఏర్పడిందని నిపుణులు స్పష్టం చేస్తున్నారు.
రాష్ట్రంలోని వివిధ ఉమ్మడి జిల్లాల వారీగా నీటి నిల్వలను పరిశీలిస్తే ఆందోళనకరమైన పరిస్థితులు కనిపిస్తున్నాయి. ముఖ్యంగా ఉమ్మడి రంగారెడ్డి, మెదక్, మరియు ఆదిలాబాద్ జిల్లాల్లో అప్పుడే తాగునీటి ఇబ్బందులు తీవ్ర రూపం దాల్చాయి. ఉమ్మడి రంగారెడ్డి జిల్లా పరిధిలోని దాదాపు 50 శాతం గ్రామాల్లో బోర్ బావులు ఎండిపోవడంతో ప్రజలు తాగునీటి కోసం ప్రైవేట్ వాటర్ ట్యాంకర్లపై ఆధారపడాల్సిన దుస్థితి ఏర్పడింది. మిగతా ఏడు ఉమ్మడి జిల్లాల్లో ప్రస్తుతానికి తాగునీటి సరఫరా సాధారణంగా ఉన్నప్పటికీ, రాబోయే వేసవి కాలం నాటికి అక్కడ కూడా బోర్లలో నీటిమట్టం పడిపోయే ప్రమాదం పొంచి ఉంది.
మరోవైపు హైదరాబాద్ మహానగరంతో పాటు పరిసర ప్రాంతాల దాహార్తిని తీర్చే కీలకమైన సింగూరు ప్రాజెక్టులో నీటి నిల్వలు గత ఏడాదితో పోలిస్తే భారీగా తగ్గిపోయాయి. కృష్ణా, గోదావరి బేసిన్లలోని ప్రధాన ప్రాజెక్టుల్లో కూడా ఆశించిన స్థాయిలో ఇన్ఫ్లో రాలేదు. ఈ తక్కువ నీటి నిల్వలను గనుక రాబోయే యాసంగి సాగుకు పూర్తిగా విడుదల చేస్తే, వచ్చే ఎండాకాలంలో తీవ్రమైన తాగునీటి కొరత తప్పదని అధికారులు హెచ్చరిస్తున్నారు. సాగునీటి కంటే తాగునీటి అవసరాలకే మొదటి ప్రాధాన్యత ఇవ్వాలని, ప్రజలంతా నీటిని అత్యంత పొదుపుగా వాడుకోవాలని వాతావరణ, నీటిపారుదల శాఖ నిపుణులు సూచిస్తున్నారు.
