మహీంద్రా అండ్ మహీంద్రా సంస్థ అత్యంత ప్రతిష్టాత్మకంగా మార్కెట్లోకి తీసుకొచ్చిన మహీంద్రా థార్ రాక్స్ ఎస్యూవీకి దేశవ్యాప్తంగా క్రేజ్ రోజురోజుకూ పెరిగిపోతోంది. కేవలం సాధారణ కారు ప్రియులనే కాకుండా, బాలీవుడ్ స్టార్ సెలబ్రిటీలను, సోషల్ మీడియా ఇన్ఫ్లుయెన్సర్లను సైతం ఈ లైఫ్స్టైల్ ఎస్యూవీ అమితంగా ఆకట్టుకుంటోంది. ఈ కారును తమ గ్యారేజ్లో చేర్చుకున్న టాప్ సెలబ్రిటీల జాబితా మరియు వారి కార్ల ప్రత్యేకతలు ఇప్పుడు నెట్టింట వైరల్ అవుతున్నాయి.
సోషల్ మీడియా సెన్సేషన్ ఓరి ఈ లగ్జరీ ఎస్యూవీని సొంతం చేసుకున్న తాజా సెలబ్రిటీగా నిలిచారు. ప్రముఖ ఇన్ఫ్లుయెన్సర్ ఎల్విష్ యాదవ్, ఓరి ఖత్రోన్ కే ఖిలాడీ రియాలిటీ షోలో పాల్గొన్నందుకు అభినందనలు తెలుపుతూ నెబ్యులా బ్లూ రంగు థార్ రాక్స్ను బహుమతిగా అందించారు. ఇప్పటికే ఆయన గ్యారేజ్ లో లగ్జరీ మెర్సిడెస్ బెంజ్ జి-క్లాస్ కారు ఉన్నప్పటికీ, ఈ కొత్త రఫ్ అండ్ టఫ్ ఎస్యూవీ కూడా వచ్చి చేరింది. బాలీవుడ్ స్టార్ హీరోయిన్ మలైకా అరోరా కూడా ఈ కారును డెలివరీ తీసుకున్నారు.
ఆమె ఈ ఎస్యూవీకి చెందిన ప్రత్యేకమైన స్టార్ ఎడిషన్ మోడల్ను ఎంచుకోగా, అది ఆకర్షణీయమైన సిట్రైన్ ఎల్లో రంగులో మెరిసిపోతోంది. సాధారణ మోడళ్లతో పోలిస్తే ఈ స్టార్ ఎడిషన్లో డిజైన్ పరంగా కొన్ని ప్రత్యేకమైన మార్పులు ఉన్నాయి. బాలీవుడ్ యాక్షన్ హీరో జాన్ అబ్రహం గ్యారేజ్ లో ఉన్న థార్ రాక్స్ అన్నింటికంటే విభిన్నంగా ఉంది. ఆయన కోసం మహీంద్రా సంస్థ దీన్ని ప్రత్యేకంగా కస్టమైజ్ చేసింది. ఈ కారు సి-పిల్లర్పై జాన్ అబ్రహం పేరు గుర్తింపుగా “JA” బ్యాడ్జ్లను అమర్చారు.
అంతేకాకుండా లోపలి భాగంలో మేడ్ ఫర్ జాన్ అబ్రహం.. అని రాసి ఉన్న మెటాలిక్ ప్లేట్, సీట్ల హెడ్రెస్ట్లపై పసుపు రంగుతో “JA” సంతకం ఎంబ్రాయిడరీ చేసి ఉండటం విశేషం. భారత మార్కెట్లో మహీంద్రా థార్ రాక్స్ ప్రారంభ ధర రూ. 12.52 లక్షల నుండి ప్రారంభమై, టాప్-ఎండ్ వేరియంట్ రూ. 23.52 లక్షల వరకు అందుబాటులో ఉంది. ఇది 2.0-లీటర్ టర్బో-పెట్రోల్ మరియు 2.2-లీటర్ టర్బో-డీజిల్ ఇంజిన్ ఆప్షన్లతో వస్తుంది. రెండు ఇంజిన్లు కూడా 6-స్పీడ్ మాన్యువల్ లేదా 6-స్పీడ్ ఆటోమేటిక్ గేర్బాక్స్తో రియర్-వీల్ డ్రైవ్, పక్కా ఆఫ్-రోడింగ్ కోసం 4×4 కాన్ఫిగరేషన్ను కలిగి ఉన్నాయి.
