ఆంధ్రప్రదేశ్‌లో గ్రామ పంచాయతీల అభివృద్ధిని పరుగులు పెట్టించేందుకు, స్థానిక ఎన్నికల్లో ఏకగ్రీవాలను ప్రోత్సహించేందుకు ముఖ్యమంత్రి చంద్రబాబు నాయుడు నేతృత్వంలోని ప్రభుత్వం కీలక నిర్ణయం తీసుకుంది. ఎన్నికలు లేకుండా ఏకగ్రీవమయ్యే గ్రామ పంచాయతీలకు అందించే ఆర్థిక ప్రోత్సాహకాలను భారీగా పెంచుతూ రాష్ట్ర ప్రభుత్వం తాజాగా అధికారిక ఉత్తర్వులు జారీ చేసింది. గ్రామాల్లో ఎన్నికల వల్ల తలెత్తే వర్గ విభేదాలను నివారించి, గ్రామస్థులందరినీ అభివృద్ధిలో భాగస్వాములను చేయాలనే లక్ష్యంతో ప్రభుత్వం ఈ బంపర్ ఆఫర్‌ను ప్రకటించింది.
తాజా ఉత్తర్వుల ప్రకారం జనాభా ప్రాతిపదికన మూడు కేటగిరీలుగా విభజించి నజరానాలను ఖరారు చేశారు. 5 వేల లోపు జనాభా ఉన్న పంచాయతీలకు రూ. 15 లక్షలు, 5 వేల నుంచి 10 వేల మధ్య జనాభా ఉన్న పంచాయతీలకు రూ. 25 లక్షలు, అలాగే 10 వేలకు పైగా జనాభా ఉన్న మేజర్ పంచాయతీలకు ఏకంగా రూ. 50 లక్షల వరకు బహుమానం అందించనున్నారు. గతంలో కనిష్టంగా రూ. 5 లక్షలుగా ఉన్న ఈ నజరానాను ఇప్పుడు రూ. 15 లక్షలకు, గరిష్టంగా రూ. 20 లక్షలుగా ఉన్న మొత్తాన్ని రూ. 50 లక్షలకు పెంచడం విశేషం.
ప్రభుత్వం ప్రకటించిన ఈ భారీ ప్రోత్సాహక నిధులు ఆయా గ్రామ పంచాయతీలలో మౌలిక సదుపాయాల కల్పన మరియు గ్రామాభివృద్ధి పనులకు ఎంతగానో ఉపయోగపడతాయని ప్రభుత్వం భావిస్తోంది. సర్పంచ్ పదవితో పాటు గ్రామంలోని అన్ని వార్డు సభ్యుల స్థానాలు కూడా ఏకగ్రీవమైతేనే ఈ ప్రత్యేక నిధులకు అర్హత లభిస్తుంది. చంద్రబాబు సర్కార్ తీసుకున్న ఈ నిర్ణయంతో గ్రామీణ ప్రాంతాల్లో ఏకగ్రీవ ఎన్నికల దిశగా గ్రామ పెద్దలు, స్థానిక నేతలు కసరత్తు ముమ్మరం చేశారు.
