తెలంగాణ రాజకీయాల్లో అత్యంత స్టైలిష్, హుందాగా ఉండే పాలిటీషియన్‌గా బీఆర్ఎస్ వర్కింగ్ ప్రెసిడెంట్, మాజీ మంత్రి కల్వకుంట్ల తారక రామారావుకు ప్రత్యేక గుర్తింపు ఉంది. సూట్ వేసినా, ఫ్యాంట్ షర్టు ధరించినా ఆయన లుక్ ఎప్పుడూ క్లాస్‌గా, కార్పొరేట్ శైలిలో ఉంటుంది. అయితే, ఇటీవల కాలంలో కేటీఆర్ తన శైలిని పూర్తిగా మార్చేశారు. గత కొద్ది రోజులుగా ఆయన గడ్డం బాగా పెంచి సరికొత్త మాస్ అవతారంలో కనిపిస్తున్నారు. రాబోయే రోజుల్లో ప్రజాక్షేత్రంలో మరింత దూకుడుగా, ఒక పక్కా మాస్ లీడర్‌గా ప్రజలకు చేరువ కావాలనే వ్యూహంతోనే కేటీఆర్ ఈ లుక్‌ను మెయింటైన్ చేస్తున్నారని ఆయన సన్నిహిత వర్గాలు చెప్తున్నాయి.
కానీ, ఈ సరికొత్త మేకోవర్ ఇప్పుడు గులాబీ పార్టీలోనే పెద్ద చర్చకు, కొంత అసంతృప్తికి దారితీస్తోంది. విశ్వసనీయ సమాచారం ప్రకారం.. కేటీఆర్ పెంచిన ఈ ఒత్తైన గడ్డం లుక్ సొంత పార్టీకి చెందిన కొందరు సీనియర్ నేతలకు సైతం అంతగా నచ్చడం లేదు. ఐటీ మంత్రిగా, గ్లోబల్ లీడర్‌గా దేశ విదేశీ ప్రతినిధులను ఆకర్షించిన కేటీఆర్ క్లీన్ షేవ్ లుక్కే ఎంతో హుందాగా ఉంటుందని వారు అంతర్గత సంభాషణల్లో అభిప్రాయపడుతున్నారు. అటు సోషల్ మీడియాలో కూడా బీఆర్ఎస్ కార్యకర్తలు, కేటీఆర్ అభిమానులు దీనిపై పెద్ద ఎత్తున కామెంట్స్ చేస్తున్నారు.
“అన్నా.. మీరు క్లాస్ లుక్‌లోనే సూపర్‌గా ఉంటారు. దయచేసి ఆ గడ్డం తీసేయండి”, “పాత కేటీఆర్ అన్నను మిస్ అవుతున్నాం” అంటూ ఎక్స్, ఇన్‌స్టాగ్రామ్‌ వేదికగా వందలాది మంది అభిమానులు ఓపెన్‌గానే తమ ఆవేదనను వ్యక్తం చేస్తున్నారు. కార్యకర్తల నుంచి ఇంతలా ఒత్తిడి వస్తున్నా.. కేటీఆర్ మాత్రం తన గడ్డం లుక్‌ను కంటిన్యూ చేయడం వెనుక బలమైన రాజకీయ కారణం ఉందని విశ్లేషకులు భావిస్తున్నారు. వాస్తవానికి, తెలంగాణలో కాంగ్రెస్ ప్రభుత్వం అధికారంలోకి వచ్చిన తర్వాత రేవంత్ రెడ్డి మార్క్ మాస్ పాలిటిక్స్‌ను ఢీకొట్టాలంటే బీఆర్ఎస్ కూడా అంతే మాస్‌గా ప్రజల్లోకి వెళ్లాల్సిన అవసరం ఏర్పడింది.
సాధారణంగా క్లాస్ లీడర్ అనే ముద్ర ఉన్న నాయకులు.. సుదీర్ఘ పాదయాత్రలు లేదా ప్రజా ఉద్యమాలకు సిద్ధమయ్యే ముందు ఇలాంటి రగ్గ్‌డ్, మాస్ లుక్‌ను ఎంచుకోవడం భారత రాజకీయాల్లో కొత్తేమీ కాదు. గతంలో వైఎస్ రాజశేఖర రెడ్డి, చంద్రబాబు నాయుడు, రాహుల్ గాంధీ వంటి వారు కూడా సుదీర్ఘ ప్రజా పర్యటనల సమయంలో గడ్డం పెంచి జనాకర్షణ సాధించారు. కేటీఆర్ కూడా రాబోయే రోజుల్లో కేడర్‌కు భరోసా ఇస్తూ రాష్ట్రవ్యాప్త పర్యటనలు లేదా పాదయాత్రకు ప్లాన్ చేస్తున్నారని, అందుకే ఈ ‘రగ్గ్‌డ్ మాస్ లీడర్’ ఇమేజ్ కోసం కష్టపడుతున్నారని తెలుస్తోంది. క్లాస్ ఇమేజ్ నుంచి మాస్ ఇమేజ్‌కి మారే క్రమంలో క్యాడర్ నుంచి ఇలాంటి తొలినాటి వ్యతిరేకత సహజమే అయినా.. భవిష్యత్తు ప్రజా పోరాటాలలో ఈ సరికొత్త లుక్ కేటీఆర్‌కు ఏ మేరకు ప్లస్ అవుతుందో చూడాలి.
