ఆంధ్రప్రదేశ్‌లో ఇటీవల ముగిసిన స్థానిక సంస్థల ఎన్నికలలో తెలుగుదేశం-జనసేన-బీజేపీ కూటమి ఘనవిజయం సాధించినప్పటికీ, అంతర్గతంగా కొందరు మంత్రుల పనితీరు, వ్యూహాలపై ఇప్పుడు రాజకీయ వర్గాలలో ఆసక్తికరమైన చర్చ నడుస్తోంది. ఎన్నికల నోటిఫికేషన్ వచ్చిన సమయంలో.. క్షేత్రస్థాయిలో పార్టీలను సమన్వయం చేస్తూ జిల్లా అంతటా కూటమి క్లీన్ స్వీప్ చేసేలా చూడాల్సిన పెద్ద బాధ్యతను అధిష్టానం ఆయా జిల్లాల ఇన్-ఛార్జ్ మంత్రులకు అప్పగించింది.
కానీ, వాస్తవ పరిస్థితులను పరిశీలిస్తే మంత్రులు తమకు కేటాయించిన జిల్లాల సంగతి దేవుడెరుగు.. కనీసం తమ సొంత నియోజకవర్గాల పరిధిని దాటి పక్క నియోజకవర్గాల్లో కూడా స్వేచ్ఛగా రాజకీయం చేయలేని ఇరుకున పడ్డారనే విశ్లేషణలు వ్యక్తమవుతున్నాయి. సాధారణంగా ఒక జిల్లాకు ఇన్-ఛార్జ్ మంత్రిగా ఉన్నప్పుడు జిల్లా కేంద్రాలు, కార్పొరేషన్లు, మేయర్ స్థానాలు, ప్రధాన మున్సిపాలిటీలపై ప్రత్యేక దృష్టి పెట్టాలి. కానీ, ఈ ఎన్నికల్లో మెజారిటీ మంత్రులు ప్రతిష్టాత్మకమైన మేయర్ స్థానాలను, నగర రాజకీయాలను స్థానిక ఎమ్మెల్యేలకే వదిలేశారు.
తాము మాత్రం కేవలం గ్రామీణ ప్రాంతాలకు పరిమితమై జెడ్‌పీటీసీ, ఎంపీటీసీ ఎన్నికల ప్రచారంలోనే ఎక్కువగా కనిపించారు. దీనికి ప్రధాన కారణం.. చాలా నియోజకవర్గాల్లో వైసీపీ ఓటు బ్యాంకు క్షేత్రస్థాయిలో బలంగా ఉండటం, కూటమి తరఫున ఆశావహుల సంఖ్య పెరిగి తిరుగుబాట్లు వెల్లువెత్తడమే. సొంత నియోజకవర్గంలోనే అభ్యర్థుల ఎంపిక, అసంతృప్తుల సమన్వయం మంత్రులకు తలకు మించిన భారంగా మారింది. ప్రత్యర్థి పార్టీ గట్టి పోటీ ఇస్తుండటంతో, తమ సొంత హోమ్ టర్ఫ్‌లోనే ఎక్కడ తేడా కొడుతుందోననే భయంతో మంత్రులు జిల్లా రాజకీయాలను పక్కన పెట్టి సొంత ఇలాకాలోనే తిష్ట వేయాల్సి వచ్చింది.
మరోవైపు, అధికారంలోకి వచ్చిన తర్వాత ఆశించిన స్థాయిలో స్థానిక సమస్యలు పరిష్కారం కాకపోవడం, నియోజకవర్గాల్లో ఆశావహుల మధ్య పెరిగిన గ్రూపు రాజకీయాలు మంత్రులను మరింత ఇరకాటంలోకి నెట్టాయి. సొంత నియోజకవర్గంలో మెజారిటీ తగ్గితే మంత్రి పదవికే ఎసరు వస్తుందనే అధిష్టానం హెచ్చరికల నేపథ్యంలో.. వారు రిస్క్ తీసుకోలేకపోయారు. ఫలితంగా, జిల్లా వ్యాప్తంగా ఉధృత ప్రచారం నిర్వహించి కూటమి ఏకపక్ష విజయం సాధించేలా గైడ్ చేయాల్సిన ఇన్-ఛార్జ్ మంత్రులు.. అటు స్వేచ్ఛగా నియోజకవర్గం దాటలేక, ఇటు సొంత క్యాడర్‌ను పూర్తిగా కంట్రోల్ చేయలేక తీవ్రంగా ఇబ్బంది పడ్డారు. కూటమి విజయం సాధించినా.. అది క్షేత్రస్థాయిలో కేవలం స్థానిక సమీకరణాలు, ఎమ్మెల్యేల చొరవ వల్లే సాధ్యమైందని, ఇన్-ఛార్జ్ మంత్రులుగా వీరు ఆశించిన మేర ప్రభావం చూపలేకపోయారనేది ఈ ఎన్నికల ద్వారా స్పష్టమవుతున్న పచ్చి నిజం.
