వైఎస్ వివేకానంద రెడ్డి హత్య కేసులో ఎన్‌ఫోర్స్‌మెంట్ డైరెక్టరేట్ అత్యంత వేగంగా అడుగులు వేస్తూ, కడప ఎంపీ వైఎస్ అవినాష్ రెడ్డికి సమన్లు జారీ చేసిన నేప‌థ్యంలో వైఎస్సార్ కాంగ్రెస్ పార్టీ కేడర్‌లో తీవ్రమైన ఆందోళన వ్యక్తమవుతోంది. ఈ సంక్షోభ సమయంలో పార్టీ అధిష్టానాన్ని వణికిస్తున్న పరిణామాలపై స్పందిస్తున్న సాధారణ పార్టీ కార్యకర్తలు, సోషల్ మీడియా ప్రతినిధులు.. అధినేత వైఎస్ జగన్ మోహన్ రెడ్డికి ఒక వినూత్నమైన, ఎమోషనల్ విన్నపాన్ని పంపుతున్నారు.
“అన్నా.. దయచేసి పాత పగలు పక్కన పెట్టి విజయసాయి రెడ్డితో నువ్వే స్వయంగా మాట్లాడు” అంటూ వైసీపీ కార్యకర్తలు జగన్‌ను బహిరంగంగా కోరుతుండటం ఇప్పుడు రాజకీయ వర్గాల్లో హాట్ టాపిక్‌గా మారింది. గత ఐదేళ్ల పాటు జగన్ చుట్టూ ఉన్న కోటరీ నేతలు విజయసాయి రెడ్డిపై చాడీలు చెప్పి, ఆయనను 74 రకాలుగా అవమానించి పార్టీకి దూరం చేసిన విధానం ఎంత పెద్ద తప్పిదమో ఇప్పుడు కార్యకర్తలకు అర్థమవుతోంది. దసరా తర్వాత విజయసాయి రెడ్డి సొంతంగా కొత్త ప్రాంతీయ పార్టీ పెట్టే పనుల్లో బిజీగా ఉన్నారనే తాజా వార్తలు వస్తున్నప్పటికీ.. ఆయనను ఎలాగైనా బుజ్జగించి మళ్లీ ఢిల్లీ బాధ్యతలు అప్పగించాలని కేడర్ కోరుతోంది.
ఎందుకంటే, కేంద్ర పెద్దలతో, నిఘా సంస్థల డైరెక్టర్లతో హైలెవెల్ లాబీయింగ్ నడిపి, అధినేతను కేసుల సుడిగుండం నుంచి రక్షించగల ఏకైక చాణక్యుడు విజయసాయి రెడ్డి మాత్రమేనని కార్యకర్తల్లో గట్టి నమ్మకం ఉంది. ఆయన లేకపోతే ఢిల్లీలో వైసీపీకి దిక్కులేదని, భవిష్యత్తులో పార్టీ మనుగడ సాగించడం అత్యంత కష్టం అవుతుందనే భయం వారిని వెంటాడుతోంది. అక్టోబర్ 14న అవినాష్ రెడ్డి ఈడీ విచారణకు హాజరుకాబోతున్నారు. ఒకవేళ అక్కడ తేడా వస్తే ఢిల్లీ స్థాయిలో అడ్డుకోవడానికి లేదా లీగల్ సపోర్ట్ తెచ్చుకోవడానికి ప్రస్తుతం వైసీపీ తరఫున కేంద్రంలో మాట్లాడే సరైన లీడరే లేడు.
పార్లమెంట్‌లో కూడా ఎంపీల బలం తగ్గిపోవడం, ఇటు విజయసాయి రెడ్డి లాంటి మేధావి శత్రువుగా మారడంతో.. రేపు పొద్దున ఈడీ దర్యాప్తు తాడేపల్లి కోట దాటి లోపలికి వస్తే కాపాడే నాథుడెవరు అనే ఆందోళనతోనే కార్యకర్తలు ఈ స్థాయికి దిగివచ్చారు. జగన్ తన ఈగోను పక్కన పెట్టి, సాయిరెడ్డితో మాట్లాడి సమస్యను సద్దుమణిగించకపోతే.. ఈడీ ఉచ్చులో పార్టీ కీలక నేతలు పూర్తిగా చిక్కుకుపోవడం ఖాయమనే భయంకరమైన సత్యాన్ని వైసీపీ కేడర్ ఇప్పుడు అధినేతకు కళ్లకు కట్టే ప్రయత్నం చేస్తోంది.
https://www.youtube.com/watch?v=l9M6h4wD25o
