ఆంధ్రప్రదేశ్‌లో ఇటీవల ముగిసిన మున్సిపల్, జెడ్‌పీటీసీ, ఎంపీటీసీ స్థానిక సంస్థల ఎన్నికల ఫలితాలు రాష్ట్ర రాజకీయాల్లో సరికొత్త చర్చకు దారితీశాయి. అసెంబ్లీ ఎన్నికల ఘోర పరాజయం తర్వాత వైఎస్సార్ కాంగ్రెస్ పార్టీ పూర్తిగా తుడిచిపెట్టుకుపోతుందని భావించినప్పటికీ, క్షేత్రస్థాయిలో ఆ పార్టీ ఓటు బ్యాంక్ అనుకున్న స్థాయిలో పతనం కాలేదని గణాంకాలు చెప్తున్నాయి. ముఖ్యమంత్రి చంద్రబాబు నాయుడు వెల్లడించిన వివరాల ప్రకారం.. 2024 అసెంబ్లీ ఎన్నికల్లో 39.81 శాతం ఉన్న వైసీపీ ఓటు షేర్, ప్రస్తుత స్థానిక ఎన్నికల్లో 33.56 శాతానికి చేరింది.
అంటే కేవలం 6.25 శాతం మాత్రమే తగ్గింది. కూటమి ప్రభంజనాన్ని తట్టుకుని కూడా వైసీపీ 1,711 ఎంపీటీసీ, 76 జెడ్‌పీటీసీ స్థానాలను దక్కించుకోగలిగింది. అయితే, ఈ ఓటు బ్యాంక్ స్థిరంగా ఉండటానికి పార్టీ అధినేత జగన్ ఇమేజ్ ఒక కారణమైతే, నియోజకవర్గాల్లో మాజీ ఎమ్మెల్యేల భిన్నమైన వ్యవహారశైలి, అంతర్గత వ్యూహాలే ప్రధాన కారణమని రాజకీయ విశ్లేషకులు భావిస్తున్నారు. అసెంబ్లీ ఎన్నికల్లో ఓడిపోయిన తర్వాత చాలా నియోజకవర్గాల్లోని వైసీపీ మాజీ ఎమ్మెల్యేలు రెండు దారులు ఎంచుకున్నారు.
మొదటి వర్గం నేతలు ఓటమి తర్వాత నిరుత్సాహపడి క్యాడర్‌ను లైట్‌గా తీసుకోగా.. రెండో వర్గం నేతలు మాత్రం లోకల్ బాడీ ఎన్నికలను తమ ఉనికి చాటుకునే సవాల్‌గా భావించారు. ముఖ్యంగా గతంలో అహంకారం, క్యాడర్‌కు దూరం అనే విమర్శలు ఎదుర్కొన్న కొందరు ఎమ్మెల్యేలు.. ఈ ఎన్నికల్లో తమ తప్పులను సరిదిద్దుకునే ప్రయత్నం చేశారు. నియోజకవర్గాల్లో పట్టు కోల్పోకుండా ఉండేందుకు స్థానిక ద్వితీయ శ్రేణి నాయకులకు ఆర్థికంగా అండగా నిలబడటం, నామినేషన్ల సమయంలో స్వయంగా అభ్యర్థుల వెన్నంటి ఉండి ధైర్యం చెప్పడం వంటి చర్యలతో క్యాడర్‌లో నూతన ఉత్సాహం నింపారు.
ఉదాహరణకు రాయలసీమ, పల్నాడు మరియు ప్రకాశం జిల్లాలలోని కొన్ని కీలక నియోజకవర్గాల్లో కూటమి నేతల నుంచి గట్టి పోటీ ఎదురైనా.. మాజీ ఎమ్మెల్యేలు క్షేత్రస్థాయిలో వ్యూహాత్మకంగా వ్యవహరించి పార్టీ సాంప్రదాయ ఓట్లను.. ముఖ్యంగా ఎస్సీ, మైనారిటీ, మహిళా ఓటు బ్యాంకు చేజారకుండా కాపాడుకోగలిగారు. మరో ఆసక్తికరమైన అంశం ఏమిటంటే.. కూటమి ప్రభుత్వం అధికారంలోకి వచ్చిన తర్వాత కొన్ని ప్రాంతాల్లో స్థానిక నేతల అతి ఉత్సాహం, వన్ సైడ్ లేదా ఏకగ్రీవాల కోసం చేసిన ప్రయత్నాలు వైసీపీ ఓటర్లలో ఒక విధమైన ప్రతిఘటనను రగిల్చాయి.
ఈ పరిస్థితిని అనుకూలంగా మార్చుకోవడంలో కొందరు వైసీపీ ఇన్-ఛార్జ్‌లు సఫలమయ్యారు. అభ్యర్థులను భయభ్రాంతులకు గురిచేస్తున్నారనే ప్రచారాన్ని సానుభూతిగా మలచుకుని, పోలింగ్ బూత్‌ల వరకు ఓటర్లను తరలించడంలో మాజీ ఎమ్మెల్యేల నెట్‌వర్క్ క్షేత్రస్థాయిలో పనిచేసింది. అయినప్పటికీ, మెజారిటీ స్థానాలను తెలుగుదేశం, జనసేన, బీజేపీ కూటమి కైవసం చేసుకుని రికార్డు సృష్టించిన మాట వాస్తవమే అయినా.. 33 శాతానికి పైగా ఓటు బ్యాంకును వైసీపీ నిలుపుకోవడం అనేది కూటమి సర్కారుకు ఒక హెచ్చరికేనని, రాబోయే గ్రామ పంచాయతీ ఎన్నికలలో క్షేత్రస్థాయి వ్యూహాలు మరింత పకడ్బందీగా ఉండాలని తెలుస్తోంది.
